O‘zbekistonlik futbol ishqibozlari bu mavsum Turkiya Superligasini odatdagidan ham qiziqroq kuzatyapti. Sababi aniq: Eldor Shomurodov va Abbosbek Fayzullayev bir jamoada — “Istanbul Bashakshehir” safida birga harakat qilyapti. Hamyurtlarimiz ishtirokidagi har bir tur – biz uchun alohida kayfiyat, alohida intriga.
“Bashakshehir” esa bu qiziqishni oqlayapti. Yevropa kuboklariga yo‘llanma beradigan o‘rinlar uchun kurash qizg‘in, jamoa esa shakldan chiqmayapti. Nemis futbolida pishib yetilgan yosh murabbiy Nuri Shaxin qo‘l ostidagi klub oxirgi besh bahsning to‘rttasida g‘alaba qozondi, yana bir o‘yinda esa chempionlikka da’vogar “Fenerbahche” bilan durang qayd etdi. Bunday seriya istanbulliklarni kuchli to‘rtlik orzusiga ancha yaqinlashtirdi.
Eng katta syurpriz — “Roma”dan kelgan Eldor Shomurodov bo‘ldi. U Superligada haqiqiy kashfiyotga aylandi: 17 turlik birinchi davrani 12 gol bilan yakunlab, to‘purarlar ro‘yxatida birinchi o‘ringa chiqdi. Ikkinchi davraning ilk uchrashuvida ham u o‘z so‘zini aytdi — “Fotih Karagyumryuk” darvozasini ishg‘ol qildi va hisobini 13 golga yetkazib, peshqadamlik maqomini yanada mustahkamladi.
Lekin “Oltin butsa” yo‘li doim ham asfalt emas — ko‘pincha shisha. Shu paytgacha Eldor to‘purarlik poygasida asosan “Trabzonspor” hujumchisi Pol Onuachu bilan bellashib kelayotgan edi. Nigeriyalik legioner Afrika musobaqasiga ketgani sabab so‘nggi o‘yinlarda qatnashmadi va uning ko‘rsatkichi o‘zgarmay qoldi.
Ammo intriga shu yerda boshlandi: Endi Eldorning oldiga yangi va juda xavfli raqib chiqdi — braziliyalik Taliska. U “Fenerbahche”ning asosiy gol quroliga aylanib, 2026-yilning birinchi o‘yinidayoq “Alanyaspor”ga qarshi dubl qayd etdi. Shu tariqa, u gollarini 11 taga yetkazib, Onuachu bilan bir qatorga chiqdi.
Shomurodovga muxlislik qilayotganlar uchun xavotirli jihat ham shu: Taliska birdaniga “yog‘ib” ketdi. Oxirgi uchta o‘yinda besh marta to‘rni qaqshatdi. Eldor esa ko‘proq barqarorlikka tayanyapti — ko‘p holda bir gollik ssenariy. Bu yomon emas, lekin to‘purarlik poygasida ba’zan “bir gol” seni saqlab qoladi, “ikki gol” esa raqibni sindiradi.
Hozirgi vaziyat shunday:
- Eldor Shomurodov — 13 gol va yaqqol peshqadam.
- Pol Onuachu — 11 gol.
- Taliska — 11 gol.
Biroq orqadan bosim ham katta. Poygada “pastki qavat”da ko‘ringan nomlar har qanday vaqtda yuqoriga sakrab chiqishi mumkin: “Trabzonspor”dan Felipe Augusto, Ernest Muchi, “Galatasaroy”dan Mauro Ikardi, “Konyaspor”dan Umut Nayir, “Fenerbahche”dan Marko Asensio, Yussef En-Nesiri, “Gaziantep”dan Muhammad Bayo, “Beshiktosh”dan Temmi Abraxam… Bularning har biri bir-ikki o‘yinda “portlab”, jadvalni ag‘darib yuborish quvvatiga ega.
Endi e’tibor — keyingi sinovga. Eldor yetakchilik qilayotgan “Istanbul Bashakshehir” Superliganing 19-turida “Kayserispor” mehmoni bo‘ladi. 25 yanvar kuniga belgilangan ushbu bahsda hamyurtlarimizdan yana gol kutayapmiz. Ayniqsa, bu o‘yin Eldor uchun alohida motiv: birinchi davrada “Kayserispor” — u to‘p kirita olmagan kam sonli raqiblardan biri bo‘lgan.
Qisqasi, oldindagi haftalarda to‘purarlik poygasi yanada qiziydi. Eldor hozir peshqadam, lekin “Oltin butsa”ni ushlab qolish uchun endi faqat gol emas — sur’at ham kerak bo‘ladi. Muxlislar esa tayyor: har tur — yakkama-yakka duel, har gol — alohida bayram.
“Zamin”ni Telegramʻda oʻqing!
