Afrika millatlar kubogi finalidagi eng bahsli va og‘riqli lahzalardan biri — Brahim Diasning penaltini “panenka” uslubida ijro etishi bo‘ldi. Sobiq Marokash bosh murabbiyi Erve Renar esa bu qarorni kechirib bo‘lmaydigan xatolar qatoriga kiritib, keskin tanqid qildi.
Eslatib o‘tamiz, final uchrashuvining 90+24-daqiqasida hisob 0:0 edi. Aynan shu paytda Marokashga g‘alaba eshigini ochib berishi mumkin bo‘lgan 11 metrli zarba Diasga ishonib topshirildi. Ammo u to‘pni oddiy, xavfsiz zarba bilan emas, “panenka” deb ataladigan nozik va tavakkal uslubda tepdi. Natijada u gol ura olmadi — imkoniyat havoga uchdi.
Renarning pozitsiyasi juda qat’iy: u futbolchining xato qilishga haqqi borligini tan olsa-da, aynan shunday hal qiluvchi daqiqada bunday “shou”ga o‘xshash qarorni qabul qilolmasligini aytdi.
Uning so‘zlariga ko‘ra, bu holat faqat bir zarba emas — bu 50-yil davomida katta g‘alaba ortidan yugurib kelgan xalqning orzusi, umidi, intizoriga nisbatan hurmat masalasi ham.
Renar Sport.es nashriga bergan fikrida shunday mazmunda gapirgan:
"Futbolda adashish mumkin, ammo bunday vaziyatda “panenka” qilishga men mutlaqo qarshiman. Bu butun mamlakat va xalqqa nisbatan hurmatsizlikka o‘xshaydi. Men bunga nisbatan hech qanday hamdardlik bildirmayman."
Sobiq murabbiy bu kabi holatni avval ham boshidan kechirganini esladi. U Arab millatlar kubogida Marokashga qarshi o‘yinda futbolchisi Abdulla al-Hamdan ham “panenka” uslubida penaltini amalga oshirib, gol ura olmaganini aytdi. Renar o‘shanda vaziyatga juda jiddiy yondashgan: o‘yinchi o‘yindan keyin matbuot anjumaniga u bilan birga kelib, uzr so‘rashini talab qilganini ta’kidladi.
Finalning keyingi manzarasi ham Marokash uchun yanada alamli bo‘ldi. Qo‘shimcha bo‘limlarda Senegal o‘z imkoniyatini sovuqqonlik bilan ishga soldi: yagona gol kiritildi va trofey aynan ular qo‘liga o‘tdi — 1:0.
Ma’lumot uchun, Afrika millatlar kubogi finali 18 yanvar kuni bo‘lib o‘tdi. Senegal qo‘shimcha bo‘limlardagi gol evaziga Marokashni mag‘lub etib, chempionga aylandi.
Bu final shuni yana bir bor isbotladi: katta o‘yinlarda mayda detallar ham taqdirni hal qiladi. “Panenka” chiroyli ko‘rinishi mumkin, lekin ba’zan u jamoa va butun millat orzusi bilan o‘ynashishga aylanib qoladi.
“Zamin”ni Telegramʻda oʻqing!
