«Real» hujumchi Vinisius Junior bilan yangi shartnoma masalasida hali-hamon bir qarorga kelolmayapti. Madridliklar 25 yoshli yulduz bilan kelishuvni uzaytirishga umid qilyapti, ammo muzokaralar kutilganidek tez ketmayapti.
El Nacional nashri xabariga ko‘ra, asosiy to‘siq — maosh borasidagi farq. Vinisius yiliga 30 million yevro atrofida oylik talab qilyapti, «qirollik klubi» esa hozircha bunday summaga rozi bo‘lishga tayyor emas. Bu raqam «Real»ning ichki maosh siyosati va jamoadagi balans masalasini ham o‘rtaga chiqaradi — katta maosh bir o‘yinchi bilan cheklanib qolmaydi, butun kiyinish xonasiga ta’sir qiladi.
Eng qizig‘i, Vini muzokaralar cho‘zilib ketishini istamayapti. Shu sababli u klub oldiga shart qo‘ygani aytiladi: yaqin bir necha oy ichida masala ijobiy hal bo‘lishi kerak. Agar tomonlar kelishuvga kelolmasa, futbolchi jamoani tark etish variantini ham ochiq qoldiryapti. Qisqasi, bu yerda “keyinroq gaplashamiz” degan rejim ishlamaydi — vaqt ishlayapti.
Mavsum ko‘rsatkichlari ham Vinisiusning o‘zini ishonchli his qilishini tushuntirib beradi: u barcha turnirlarda 30 ta o‘yin o‘tkazib, 7 ta gol va 11 ta golli uzatma qayd etgan. Hozirgi amaldagi shartnomasi esa 2027 yil yozigacha mo‘ljallangan.
Endi «Real» uchun asosiy savol bitta: Vinisiusni jamoada ushlab qolish uchun moliyaviy qadam tashlanadimi yoki klub o‘z prinsiplarida qattiq turadimi. Muxlislar uchun esa bu mavzudagi har bir yangilik — finalga yaqinlashayotgan serialga o‘xshaydi: oxiri tezroq kelsin deysan, lekin har seriyada nerv bor.
“Zamin”ni Telegramʻda oʻqing!
