Angliya Liga kubogi yarim final javob bahsida “Manchester Siti” “Nyukasl Yunayted” ustidan 3:1 hisobida g‘alaba qozonib, final yo‘llanmasini qo‘lga kiritdi. Gvardiola jamoasi hal qiluvchi bosqichda “Arsenal”ga qarshi maydonga tushadigan bo‘lsa, ushbu o‘yin biz uchun yana bir jihatdan alohida ahamiyat kasb etdi.
Gap shundaki, hamyurtimiz Abduqodir Husanov bahsni asosiy tarkibda boshladi va to‘liq 90 daqiqa harakat qildi. Yarim final darajasidagi o‘yinda maydonda oxirigacha qolish — bu oddiy holat emas: demak, murabbiylar shtabi unga ishonayotgani, u esa ishonchni oqlayotgani ko‘rinmoqda.
Endilikda e’tiborni Husanovning o‘yin davomidagi raqamlariga qaratamiz. Chunki ba’zan himoyachi “ko‘rinmaydi”, ammo jamoa uchun eng muhim ishni aynan u qiladi — xatolik qilmaydi, to‘pni yo‘qotmaydi, o‘yinni buzmaydi.
Umumiy ko‘rsatkichlar
Husanov 90 daqiqa to‘liq maydonda bo‘ldi. Eng diqqatga sazovor jihat — paslar aniqligi: 51 ta aniq pas, jami 54 urinish (94%). Bu markaziy himoyachi uchun juda yaxshi ko‘rsatkich: “Siti” uslubida himoyachi to‘pni shunchaki tepib yubormaydi, balki o‘yin qurishda ishtirok etadi.
Shu bilan birga, u ushbu o‘yinda hech qanday zarba bermadi va golli imkoniyat yaratmadi. Bu ham tushunarli: Husanovning vazifasi bu bahsda hujum emas, orqa chiziq barqarorligi edi.
Hujumdagi ishtiroki
Teginishlar soni — 58. Bu u o‘yindan “uzilib qolmagani”ni ko‘rsatadi. Uchinchi zonaga 2 ta pas bergan. Eng “shirin” raqam esa — to‘pni yo‘qotish 0. Ha, nol. Bunday bosimli o‘yinda to‘pni bir marta ham boy bermaslik — himoyachi uchun juda kuchli plyus.
Himoyadagi ishi
Statistikada takl (to‘p olib qo‘yish) 0 deb ko‘rsatilgan bo‘lsa-da, bu har doim ham “himoya qilmadi” degani emas. Ayrim o‘yinlarda pozitsiyani to‘g‘ri ushlash, yo‘lni yopish, raqibni noqulay qarorga majbur qilish takldan ham muhimroq bo‘ladi.
Shunga qaramay, u 3 marta to‘pni tozalash (clearance) qildi, 1 marta pas yo‘lini kesdi va 4 marta to‘pni qayta qo‘lga kiritishda qatnashdi. Bu ko‘rsatkichlar “Nyukasl”ning hujumlariga qarshi zarur paytda to‘g‘ri ishlaganini bildiryapti.
Duellar va jismoniy kurash
Yerdagi duellarda 0/2 (0%) chiqqani yoqimsiz ko‘rinadi, lekin ikki duel — juda kam namuna, u yerda epizodlar hal qiluvchi emas bo‘lishi ham mumkin. Havodagi duellarda esa 1/2 (50%).
Follar qismida: Husanovga nisbatan qoida buzilmagan, o‘zi esa 2 marta fol qilgan. Ya’ni u ba’zi epizodlarda xavfni to‘xtatish uchun “aqlli fol” yo‘liga borgan bo‘lishi mumkin — ayniqsa yarim finalda bunday narsa normal holat.
Xulosa
Bu o‘yin Husanov uchun “shou” emas, balki ish kuni bo‘ldi: to‘pni yo‘qotmadi, paslarni yuqori aniqlikda tarqatdi, himoyada kerakli joyda tozalash va kesishlar qildi, eng muhimi — 90 daqiqa davomida barqaror qoldi.
Endi navbatda final atmosferasi. Agar Husanov shu barqarorlikni saqlab qolsa, “Siti”da uning roli yana ham kattalashishi mumkin. Qisqasi, jim o‘ynadi, lekin juda to‘g‘ri o‘ynadi.
“Zamin”ni Telegramʻda oʻqing!
