O‘zbekiston milliy terma jamoasi himoyachisi Abduqodir Husanov uchun joriy mavsumning birinchi yarmi oson kechmadi. Jarohatlar ketma-ketligi tufayli u bir paytlar “temir”dek ko‘ringan asosiy tarkibdagi o‘rnini boy berib qo‘ydi, o‘yin amaliyoti kamaydi, hatto ma’lum vaqt “maydondan uzilib qolgan” vaziyatlar ham kuzatildi.
Lekin futbolda bir narsa doim ishlaydi: imkoniyat kutilmagan joydan chiqadi. Xosep Gvardiola jamoasida himoya markazidagi yetakchilar — Ruben Diash, Jon Stounz va Yoshko Gvardiol jarohat olgach, 21 yoshli o‘zbek legioneri eng og‘ir pallada mas’uliyatni yelkasiga oldi. U oxirgi uchrashuvlarda himoyaning o‘rta qismida “eng kerak paytda chiqqan qutqaruvchi”dek ko‘rinib, jamoa tizimida muhim figuraga aylandi.
Bu fikrni muxlislar fikri ham tasdiqlab turibdi: Husanov "Manchester Siti" muxlislari o‘rtasida o‘tkazilgan so‘rovnomada yanvar oyining eng yaxshi futbolchisi, deb topilgani haqidagi xabarlar uning qay darajada qadrlanayotganini ko‘rsatadi. Qisqasi, u o‘zi haqidagi shubhalarni “maydonning o‘zida” yopib tashlayapti.
Shunga qaramay, qishki transfer oynasida kutilmagan yana bir voqea yuzaga chiqdi: Abduqodirni olish maqsadida APLdan ikki klub "Siti" eshigini qoqqani aytilmoqda. Bu haqda Foot365, Sport.fr, Foot Marseille, Daily Mercato, Top Mercato va WE Sport kabi manbalar bilan hamkorlik qiluvchi jurnalist Kamil Fishbax ma’lumot bergan.
Uning yana bir manba — Sports Boom xabariga tayanib yozishicha, "Everton" Husanovni to‘liq transfer qilish variantini ko‘rib chiqqan. Mersisayd klubi tarkibda yetakchi himoyachi Jarrad Brantueytga munosib o‘rinbosar kerak, degan mantiq bilan harakat qilgani aytilyapti. Shuningdek, Jek Grilish bilan bog‘liq ijara ssenariylari tilga olingani ham bu klubning rejalari “uzoqni ko‘zlab” tuzilayotganini anglatadi. "Everton" qishda maqsadiga yeta olmagan bo‘lsa-da, yozgi transferlar davrida bu urinishni davom ettirish niyati borligi ta’kidlanmoqda.
Ikkinchi tomondan, "Bornmut"ning rejasi boshqacha tus olgan. Qayd etilishicha, klub bu qishda ganalik to‘purar Antuan Semenoni bonuslar bilan qo‘shib hisoblaganda jami 75 million yevro atrofidagi kelishuv orqali “shaharliklar”ga sotgan. Endi esa manchesterliklar bilan aloqalardan unumli foydalanib, Husanovni ijaraga olish bo‘yicha murojaat qilgani aytilyapti. Andoni Iraola jamoasi bu nomzoddan hali voz kechmagan, masala yozda yana kun tartibiga chiqishi mumkin.
Nufuzli manbalarda keltirilishicha, "Siti" rahbariyati har ikki taklifni ko‘rib chiqqan, ammo ayni paytda o‘zbekistonlik futbolchi bilan xayrlashish niyati yo‘qligini bildirgan. Shu bilan birga, tahlilchilar fikricha, murakkab pallada jamoaga jon kiritgan Husanovning ketishiga Gvardiola ham osonlikcha “ha” demaydi.
Xulosa bir: Abduqodirning mavsumi endi boshlangandek. U avval jarohatlardan qaytdi, keyin imkoniyatni mahkam ushladi, endi esa transfer mish-mishlari orasida ham o‘zini yo‘qotmay turibdi. Agar u shu ruh va shu barqarorlikni saqlab qolsa, yozdagi gap-so‘zlar ko‘payishi mumkin — lekin bu safar bir narsa aniq: Husanov haqida “zaxirada qolib ketdi” deb gapirish qiyinlashib borayapti.
“Zamin”ni Telegramʻda oʻqing!
