Fransiya Liga 1ning 21-tur markaziy bahsida PSJ o‘z maydonida “Marsel”ni qabul qildi. Uchrashuvda mehmonlar deyarli hech narsa bilan esda qolmadi va parijliklar to‘liq ustunlik qilgan o‘yinda 5:0 hisobida yutdi. Darvozabon Matvey Safonov esa o‘z darvozasini daxlsiz saqlab qoldi. Bu haqda euro-football.ru xabar beradi.
O‘yinning dastlabki daqiqalaridayoq PSJ bosimni kuchaytirdi: Bredli Barkola jarima maydoniga kirib, uzoq ustun yonidan xavfli zarba berdi. 12-daqiqada esa Desire Due chap qanotda Nunyu Mendeshni ajoyib pas bilan oldinga chiqarib yubordi, Mendesh markazga uzatdi va Usmon Dembele bir teginishda aniq zarba bilan hisobni ochdi — 1:0.
“Marsel” ham bir necha bor javob qaytarishga urindi: Amin G‘uyrining yaqin ustun yonidagi zarbasini Safonov tizzasi bilan qaytardi. PSJ yana bir necha vaziyatlar yaratdi, biroq mehmonlar posboni ham ayrim epizodlarda jamoasini qutqardi. 37-daqiqada Dembele o‘ng qanotdan jarima maydoniga yorib kirib, o‘tkir burchakdan kuchli zarba bilan to‘pni to‘sin ostiga joyladi — 2:0.
Ikkinchi bo‘limda ham PSJ hujumlari tinmadi: Nevish, Due va Barkola vaziyatlarni ko‘paytirdi, Mendeshning uzatmalaridan keyin golga yaqin epizodlar bo‘ldi. “Marsel” safida esa Igor Payshaoning bosh bilan yo‘llagan zarbasini Safonov sakrab qaytardi. Barkola ham bir necha bor darvozani nishonga oldi, biroq ba’zan ustun, ba’zan aniqlik pand berdi.
64-daqiqada Joau Nevish chap qanotdan markazga oshirdi, himoyachi Fakundo Medina to‘pni uzatib yubormoqchi bo‘lib, uni o‘z darvozasiga yo‘lladi — 3:0. Oradan ko‘p o‘tmay Dembele o‘ng tomonda Xvicha Kvaratsxeliaga pas berdi va u 15 metrdan bir teginishda uzoq burchakka aniq zarba berdi — 4:0.
74-daqiqada Senni Mayulu jarima maydonida Li Kan-Inni topdi, koreyalik futbolchi yaqin burchakka aniq zarba yo‘llab hisobni yiriklashtirdi — 5:0. Yakunda PSJ bir necha marta yana darvozani ishg‘ol etishga yaqin bo‘ldi, Vitinya va Mendesh zarbalari to‘singa tegdi. Natijada 5:0 — PSJ turnir jadvalida yana peshqadam, “Marsel” esa to‘rtinchi o‘rinda qoldi.
“Zamin”ni Telegramʻda oʻqing!
