"Manchester Siti" bosh murabbiyi Pep Gvardiola himoyachi Abduqodir Husanovning ahvoli haqida gapirib, muxlislarni ancha xotirjam qildi. Eslatib o‘tamiz, u yaqinda Janluiji Donnarumma bilan to‘qnashuvdan keyin salbiy ssenariydan “qutulib qolgan” edi. Endi esa vaziyat aniq: xavotirga o‘rin yo‘q.
Gvardiolaning aytishicha, Husanovning holati yaxshi va u maydonga tushishga tayyor. Mutaxassis hatto futbolchining jamoaga moslashuvi, ayniqsa til masalasiga ham to‘xtalib o‘tdi.
“U ingliz tilida Uilyam Shekspirdek gapirmaydi, lekin tobora yaxshilanyapti”, degan mazmundagi hazilkash fikr ham aytildi. Qisqasi, hali “klassik adabiyot kechasi” emas, lekin futbol tilida Husanov hammasini juda yaxshi tushunyapti. Gvardiola uni aqlli, jismonan baquvvat, tezkor va eng kerakli nuqtalarda o‘z vaqtida paydo bo‘ladigan o‘yinchi sifatida ta’rifladi. Bu esa himoyachi uchun eng qimmat “kompliment” — to‘pni kutmaysan, pozitsiyani sotib olganday turadi.
"Husanovning holati yaxshi. U o‘ynashga tayyor. U bizning nimani istashimizni, o‘zi nima deyayotganini biladi va yanada rivojlanib boryapti. U juda aqlli. Jismonan kuchli, tez va doim kerakli pozitsiyalarda bo‘ladi", – dedi Gvardiola.
Avvalroq klub shifokori ham Husanov foydasiga qaror chiqargani haqida xabarlar chiqqan edi. Demak, tibbiy jihatdan ham, jismoniy tayyorgarlik tomondan ham futbolchida jiddiy to‘siq ko‘rinmayapti.
Endi e’tibor — ertangi o‘yinga. "Fulxem"ga qarshi bahs Toshkent vaqti bilan 00:30 da start oladi. Husanovning “o‘ynashga tayyor” ekani aytilgan ekan, demak muxlislarda bitta umid bor: maydonda yana o‘sha nazorat, tezlik va “men shu yerdaman” degan qattiq xarakterni ko‘rish.
“Zamin”ni Telegramʻda oʻqing!
