APLning 26-turida «Manchester Siti» o‘z maydonida «Fulxem»ni qabul qildi va raqibni 3:0 hisobida mag‘lub etdi. Xosep Gvardiola jamoasi bu bahsda masalani uzoqqa cho‘zmadi: birinchi bo‘limning o‘zidayoq hamma narsa joy-joyiga tushdi, stadiondagi muxlislar esa tanaffusgacha “ish bitdi” kayfiyatini his qildi.
Uchrashuv taqdiri 34–39-daqiqalar oralig‘ida hal bo‘ldi. Atigi 15 daqiqa ichida Antuan Semeno, Niko O'Rayli va Erling Holand ketma-ket gol urib, «Siti»ni qulay hisobda oldinga olib chiqdi. Shu qisqa vaqt kesimida «shaharliklar»ning pressingi, tezkor o‘tishlari va hujumdagi aniqligi «Fulxem»ni o‘z-o‘zidan himoyaga tiqib qo‘ydi.
Bu o‘yinda biz uchun eng qiziq nuqta — Abduqodir Husanovning maydonga qaytishi bo‘ldi. «Liverpul»ga qarshi uchrashuvning 60-daqiqasida yuzidan og‘ir zarba olib, maydonni erta tark etgan hamyurtimiz bu safar ham aynan 60-daqiqada zahiradan tushirildi. Gvardiolaning ko‘rsatmasiga ko‘ra, Husanov bu gal himoyaning o‘ng qanotida harakat qildi va juda ishonchli o‘ynadi. Muhimi, o‘yin tempi yuqori bo‘lgan paytda ham u vaziyatni to‘g‘ri o‘qidi, shoshilmadi, pozitsiyani yo‘qotmadi va himoyada intizomni ushlab turdi.
Qizig‘i shundaki, ekspertlar zahiradan tushgan futbolchilar orasida eng yuqori ballni ham aynan Husanovga berdi. Nufuzli manba — esteemedkompany.com tahlilchilari o‘yindan keyin «Manchester Siti» futbolchilarining harakatlarini baholab chiqdi va bir qator futbolchilarni alohida ajratib ko‘rsatdi.
Darvozabon Janluiji Donnarumma 7/10 ball oldi. Tahlilchilar uni zarur seyvlar, zarbalardan keyingi ishonchli harakatlar uchun maqtashdi. O‘ng qanotda o‘ynagan Mateush Nunesh 6,5/10 baholandi: hujumga yaxshi qo‘shilgani qayd etildi, biroq ayrim epizodlarda aniqlik yetishmagani ham aytildi. 60-daqiqada u o‘rnini Husanovga bo‘shatib berdi.
Markaziy himoyada Ruben Diash 7/10 bilan baholandi va to‘liq 90 daqiqani barqaror o‘tkazgani urg‘ulandi. Lekin eng yuqori baho Mark Gehiga — 9/10 berildi. Tahlilchilar uni «Siti»ning eng barqaror futbolchisi deb atashdi: hal qiluvchi bloklar, kerakli aralashuvlar va raqibga “o‘yinga qaytish” imkonini bermagan epizodlar aynan uning hissasi sifatida ko‘rsatildi.
Chap qanot himoyachisi Rayan Ait-Nuri 7,5/10 oldi. Uning faolligi, ayniqsa uchinchi golda muhim rol o‘ynagani ta’kidlandi — bu pozitsiyada u tobora muhim figuraga aylanayotgani sezilyapti. Yarimhimoyada Rodri 7,5/10 bilan baholanib, u o‘zining eng yaxshi holatiga qaytayotgani aytildi: paslar sifati va o‘yinni boshqarishdagi hissasi yuqori qayd etildi. Bernardu Silva ham 7,5/10 oldi — pressingni tashkil etgani, markazda faol bo‘lgani, keyin esa bir soatlar atrofida almashtirilgani tilga olindi.
Gol muallifi Niko O'Rayli 8,5/10 bilan yuqori baholandi: gol urdi, yarimhimoyaga yangi imkoniyatlar qo‘shayotgani aytildi. Antuan Semeno ham 8,5/10 oldi — birinchi golni urdi, ustiga-ustak O'Rayliga golli pasni ham aniq yetkazib berdi. Fil Foden 8/10: faol harakat, golli uzatma va umumiy energiyasi bilan muxlislarga yoqqani qayd etildi. Erling Holand 8/10 oldi: gol urdi, birinchi bo‘limda hamkorlik yaxshi bo‘ldi, ammo Yoaxim Andersen bilan qattiq to‘qnashuvdan keyin tanaffusda almashtirildi. Tahlilchilar bu qaror ehtiyot chorasi bo‘lgan degan umidni bildirishdi.
Zaxiradan tushganlar orasida Umar Marmush 6/10, Tijani Reynders 6/10 baholandi — ular o‘yinga katta ta’sir o‘tkaza olmagani aytildi. Rayan Sherki 6/10: maydonga tushdi, lekin o‘yin allaqachon hal bo‘lgani sabab juda ko‘zga tashlanmadi. Niko 6,5/10: qisqa vaqt ichida bir necha yoqimli epizodlar namoyish qildi, formada ekani sezilgan.
Eng gapirilgan baholardan biri esa Abduqodir Husanovga tegishli bo‘ldi — 7/10. Tahlilchilar uning 60-daqiqada Nunesh o‘rniga tushib, o‘yin oxirigacha o‘zining odatiy uslubida ishonchli harakat qilganini yozdi. E’tiborli jihati: Husanov bu gal o‘ng qanotda mahoratli himoyachiga xos yetuklik va intizomni namoyon etdi, deb baholandi.
Endi «Manchester Siti» APLdagi navbatdagi uchrashuvini 21 fevral kuni o‘z maydonida «Nyukasl»ga qarshi o‘tkazadi. Muxlislar uchun intriga tayyor: «Siti» hozir formaga chiqyapti, Husanov esa har bir daqiqada o‘zini ko‘rsatib, ishonchni mustahkamlayapti. Eng muhimi — barqarorlik: APLda aynan shu sifat seni “zahiradan tushadigan yigit”dan “asosiy tarkib nomzodi”ga aylantiradi.
