MLS muntazam chempionati start olishiga atigi 10 kun qolgan paytda “Inter Mayami”ga noxush xabar keldi: jamoaning asosiy yulduzi Lionel Messi bir muddatga safdan chiqdi. Klub ma’lumotiga ko‘ra, argentinalik futbolchi Ekvadorda “Barselona SK”ga qarshi o‘rtoqlik uchrashuvida 2:2 hisobidagi bahs davomida son orqa mushagini cho‘zib olgan.
Messi o‘sha o‘yindan keyin jamoa mashg‘ulotlarida qatnashmadi — mushakdagi taranglik hali ham bor. Shuning uchun klub shifokorlari uning holatini kunma-kun nazorat qilib, tiklanish jarayonini ehtiyotkorlik bilan olib bormoqda: qayta mashg‘ulotga qaytishi ham bosqichma-bosqich, holatga qarab hal qilinadi.
“Inter Mayami” yangi mavsumni 21 fevral kuni safarda “Los-Anjeles”ga qarshi o‘yin bilan boshlaydi. Bu jamoa safida Son Xyon Min va Deni Buanga kabi taniqli futbolchilar borligi ham intrigani yanada oshiradi.
Floridaliklar bosh murabbiyi Xaver Maskerano esa shoshma-shosharlik kerak emasligini uqtiryapti: 38 yoshli Messining butun mavsum davomida sog‘lom bo‘lib yurishi bitta o‘yindan ko‘ra muhimroq. Ayniqsa, oldinda 2026 yilgi jahon chempionati turganini hisobga olsak, “hozir chiqib, yanada og‘irlashtirib qo‘yish” — eng yomon ssenariy.
Messi bo‘lmagan paytda hujumda asosiy rol yangi futbolchi Xerman Berteramega berilishi kutilmoqda. O‘tgan mavsum Messi “gol + pas” tizimi bo‘yicha 48 ochko jamg‘arib, liga tarixidagi ikkinchi eng yaxshi ko‘rsatkichlardan birini qayd etgani aytiladi — demak, uning yo‘qligi har qanday jamoaga seziladi.
Bu mavsum “Inter Mayami” bir vaqtning o‘zida uchta musobaqada bosh sovrin uchun kurashadi. Bundan tashqari, klubning yangi uyi — “Mayami Fridom Park” arenasi 2026 yilda ochilishi rejada. Shu fondo Messining 2028 yil oxirigacha shartnomani uzaytirgani ham simvolik: yangi stadionning asosiy yulduzi sifatida aynan u ko‘zda tutilyapti.
Qisqasi, “Inter Mayami” hozir “panika” emas, “aql bilan sabr” rejimida bo‘lishi shart. Messi mavsum boshida 1-2 o‘yinni o‘tkazib yuborsa ham, keyin sog‘lom holda qaytib, butun yil davomida jamoani tortib yursa — bu ancha foydali. MLS uzun marafon, bu yerda “birinchi sprint”ni yutaman deb motorni yoqib yuborish shart emas.
