Upamekano Bavariya bilan shartnomasini uzaytirgani haqida gapirdi

Dayo Upamekanoning kelajagi borasidagi mish-mishlarga nuqta qo'yildi: «Bavariya» markaziy himoyachi bilan shartnoma uzaytirilganini rasman e'lon qildi. 27 yoshli futbolchi yangi kelishuvga imzo chekkanidan so'ng fikrlarini bildirdi. Bu haqda euro-football.ru xabar beradi.

«Bavariya»da qolayotganimdan juda xursandman va bu jamoa safida o'ynashda davom etaman. Tarkibimiz kuchli, murabbiyimiz ham zo'r — birgalikda katta maqsadlarni oldimizga qo'yganmiz. Hayotda hammasini mentalitet hal qiladi: har bir mashg'ulotda sheriklarim uchun borimni beraman, har o'yinda darvozamizni daxlsiz saqlashni istayman va «Bavariya» bilan imkon qadar ko'proq sovrin yutishni maqsad qilganman», — deya Upamekanoning so'zlarini klub sayti keltirdi.

Endi Upamekanoning «Bavariya» bilan amaldagi shartnomasi 2030 yil yozigacha mo'ljallangan.

Shanba kuni «Bavariya» safarda «Verder»ga qarshi maydonga tushadi.