Germaniya Bundesligasining 22-turida Dortmundning «Borussiya»si «Signal Iduna Park»da «Maynts»ni qabul qildi va uchrashuv taqdirini deyarli birinchi bo'limdayoq hal qilib qo'ydi. Bu haqda euro-football.ru xabar beradi.
10-daqiqada Yulian Ryersonning uzatmasidan so'ng Seru Girassi bosh bilan hisobni ochdi. Oradan besh daqiqa o'tib, Ryerson yana bir bor aniq pas uzatdi — bu safar Maksimilian Bayer «ikkinchi qavat»dan foydalandi va farqni ikkitaga yetkazdi. Tanaffus arafasida esa ilk gol muallifi Girassi Ryersonning uchinchi golli uzatmasini ham golga aylantirib, dubl qayd etdi — 3:0.
Ikkinchi bo'limda «Maynts» darvozaboni bir necha bor jamoasini qutqarishga urinib ko'rdi: u Feliks Nmechining xavfli zarbasini qaytardi, standart vaziyatdan keyin Sheraldo Beker yo'llagan to'pni ham ushladi. Biroq 84-daqiqada Ryerson burchak zarbasini uzatdi, natijada to'p himoyachi Dominik Kor orqali o'z darvozasiga kirib ketdi — 4:0.
Ushbu g'alabadan keyin «Borussiya» turnir jadvalida «Bavariya»dan bor-yo'g'i uch ochko ortda qoldi. «Maynts» esa quyi pog'onalarda, oxiridan beshinchi o'rinda bormoqda.
“Zamin”ni Telegramʻda oʻqing!
