Italiya chempionatida kuchli beshlikka yaqinlashib kelayotgan «Komo» shanba kuni o‘z maydonida autsayder «Fiorentina»ni qabul qildi. Bu haqda euro-football.ru xabar beradi.
Uchrashuvning birinchi bo‘limi o‘rtalarida florensiyaliklar hisobni ochdi: Nikolo Fadjoli dastlab himoyachiga tekkan zarbadan so‘ng qaytgan to‘pni ikkinchi urinishda aniq yakunlab, mehmonlarni oldinga olib chiqdi — 0:1.
54-daqiqada «Fiorentina» ustunligini oshirdi — Moyze Kin penaltini sovuqqonlik bilan ijro etdi: to‘p burchakka yo‘naldi, darvozabon esa joyidan qimirlamadi — 0:2. Oradan ko‘p o‘tmay Martin Baturina uzoqdan xavfli zarba yo‘lladi, biroq to‘p darvoza ustuniga yaqin joydan o‘tib ketdi.
70-daqiqada mehmonlar bosh murabbiyi Paolo Vanoli hakamga aytilgan gaplari uchun maydondan chetlatildi. 77-daqiqada esa «Komo» hisobni qisqartirdi: Alvaro Morataning bosh bilan yo‘llagan zarbasidan keyin to‘p Fabiano Pariziga tegib, darvozaga kirib ketdi — 1:2. O‘yin yakunida Morata janjalda ishtirok etib, qizil kartochka oldi.
G‘alabaga qaramay, «Fiorentina» turnir jadvalida pastdan uchinchi o‘rinda qolmoqda. «Komo» esa oltinchi pog‘onada bormoqda.
“Zamin”ni Telegramʻda oʻqing!
