La Ligada peshqadamlik kurashi yanada qizidi: Mishel boshqaruvidagi «Girona» o'z maydonida «Barselona»ni 2:1 hisobida mag'lub etib, kataloniyaliklarga ketma-ket ikkinchi zarbani berdi va turnir jadvalining tepasida Madridning «Real»ini qoldirdi. Bu haqda euro-football.ru xabar beradi.
Ushbu natijadan so'ng Kilian Mbappe yetakchiligidagi «Real» «Barselona»ni 2 ochkoga ortda qoldirmoqda. «Montilivi»dagi o'yinda mehmonlar avvaliga Pau Kubarsi goli bilan oldinga chiqdi, ammo oradan ikki daqiqa o'tib Toma Lemar hisobni tenglashtirdi. Yakuniy so'zni esa 86-daqiqada Fran Beltran aytdi.
Uchrashuvdan keyin «Girona»ning yorqin futbolchilari alohida e'tirof etildi. «River Pleyt» tarbiyalanuvchisi, huquqi «Manchester Siti»ga tegishli bo'lgan Klaudio Echeverri maydonga kechroq tushganiga qaramay, qisqa vaqt ichida raqib jarima maydoni atrofida katta bosim yaratdi va hal qiluvchi hujum oldidan to'pni oldinga olib chiqishda muhim rol o'ynadi.
Zahira o'yinchilari orasida eng katta foyda keltirgani esa «Rayo» akademiyasidan chiqqan Fran Beltran bo'ldi. U faoliyat borasida Echeverridan ortda qolgan bo'lsa-da, samaradorlikda yutdi: jarima maydoni chizig'idan aniq zarba yo'llab, «Gironaga» g'alaba taqdim etdi.
«Girona»ning ukrainalik futbolchilari ham o'zini ko'rsatdi. Viktor Tsigankov o'ng qanotda tinimsiz ishladi, bir necha bor xavfli uzatmalar berdi va pressingda foydali harakat qildi.
Vladislav Vanat esa 73 daqiqa ichida doimiy ravishda himoyachilar ortidan bo'sh zonalarni topib, keskinlik yaratdi. U Lemarning goliga olib kelgan hujumda faol ishtirok etdi, yana bir nechta vaziyatlarda zarba pozitsiyasiga chiqdi. Yakunda «Girona»ning aynan shu jamoaviy faolligi «Barselona»dan ochkolarni tortib olishga xizmat qildi.
“Zamin”ni Telegramʻda oʻqing!
