Chempionlar ligasining 2025/2026 yilgi mavsumi pley-off bosqichi ilk uchrashuvida Lissabondagi kecha ancha “issiq” o‘tdi. «Benfika» o‘z maydonida «Real»ga 0:1 hisobida imkoniyatni boy berdi, o‘yinning eng ko‘p muhokama qilingan nuqtasi esa gol emas, maydon chetidagi dramatik epizodlar bo‘ldi.
Mezbonlar bosh murabbiyi Joze Mourinio bahs davomida maydondan chetlatildi. Uning aytgan gaplari esa o‘ziga xos “Mour” stilida, to‘g‘ridan to‘g‘ri va achchiq: go‘yoki uni “oddiy haqiqatni aytgani” uchun haydab yuborishgan.
Mourinio «Marca» nashriga bergan izohida shunday dedi: hakamda «Real» futbolchilaridan kimlar navbatdagi sariq kartochka olsa, keyingi o‘yinni o‘tkazib yuborishini ko‘rsatuvchi maxsus ro‘yxat bor edi. U tajribadan kelib chiqib, qaysi o‘yinchilar “xavf zonasi”da ekanini yaxshi tushunishini ta’kidladi. Shu bilan birga, u raqibni ham inkor etmadi: «Real» g‘alabaga loyiq edi, dedi.
Eng og‘iri — jazo faqat bir o‘yinlik diskvalifikatsiya bilan cheklanmasligi. Mourinioning so‘zlariga ko‘ra, u javob bahsida jamoasi yonida bo‘la olmaydi, hatto kiyim almashtirish xonasiga kirish va futbolchilar bilan gaplashish huquqidan ham mahrum. Ammo u “plan B”ni ham tayyor qilib qo‘ygan: yordamchilari vazifani bajaradi, degan ishonchni bildirdi.
O‘yinning o‘zida esa diqqatni tortgan epizod 85-daqiqada ro‘y berdi. «Real» vingeri Vinisius Junior mezbonlar yarimhimoyachisi Richard Riosning oyog‘iga zarba berdi. Bosh hakam Fransua Letekse ushbu holatni e’tiborsiz qoldirdi. Bu esa tabiiy ravishda «Benfika» lagerini “portlatib” yubordi: chunki bundan oldin Vinisius golni noodatiy nishonlagani va raqib himoyachisi Janluka Prestiani bilan tortishgani uchun ogohlantirilgandi. Ya’ni, maydonda allaqachon “nerv” baland bo‘lib turgan payt.
Mourinio aynan shu yerda o‘zini tiyib tura olmadi: hakam yordamchisiga keskin norozilik bildirdi, faol imo-ishoralar bilan e’tirozini ochiq ko‘rsatdi va avval sariq kartochka oldi. Keyin bosh hakam bilan suhbatdan so‘ng ikkinchi sariq ham chiqdi — natijada murabbiy maydon chetini tark etishga majbur bo‘ldi.
Qisqasi, «Benfika» minimal hisobda yutqazdi, ammo keyingi o‘yin oldidan psixologik fon ancha qizib ketdi. Endi javob bahsida asosiy savol shu: «Benfika» maydonda hisobni qaytarishga ulguradimi va Mouriniosiz jamoa qanday reaksiya qiladi? Bir narsa aniq — bu juftlik hali “serial”ni tugatgani yo‘q.
