Dimarko Mxitaryan uchrashuvning eng yaxshisi bo‘lishi kerak edi

“Inter”ning chap qanot himoyachisi Federiko Dimarko “Lechche” ustidan A Seriyada 2:0 hisobidagi g‘alabadan so‘ng fikr bildirdi. Bu haqda euro-football.ru xabar beradi.

“Neradzurrilar” hisobni faqat 75-daqiqada Genrix Mxitaryan urgan gol evaziga ochdi. 82-daqiqada esa Dimarko uzatmasidan keyin Manuel Akandji darvozani ishg‘ol qilib, yakuniy natijani belgiladi. Shunga qaramay, o‘yin yakunida eng yaxshi futbolchi sovrini aynan Dimarkoga berildi.

“Menimcha, mukofot Mxitaryanga berilishi kerak edi — u juda yaxshi o‘ynadi. Sovrinni farzandlarimga beraman: ular bunday sovrinlar bilan o‘ynashni yaxshi ko‘rishadi va men uchun asrab qo‘yishadi. Jamoaviy g‘alaba har doim individual mukofotdan ustun”, — dedi Dimarko DAZN’ga.

“Mxitaryanning goli biz uchun katta yengillik bo‘ldi. Oson bo‘lmasligini bilardik, chunki “Lechche” juda yaxshi tashkil etilgan jamoa”, — deya qo‘shimcha qildi u.

Bu g‘alabadan so‘ng “Inter” ikkinchi o‘rindagi “Milan”dan 10 ochkoga uzoqlashdi.