Inter jamoasining yulduzi Federico Dimarco 2024-25-yilgi omadsiz mavsumdan soʻng oʻzini «tugagan» deb hisoblagan tanqidchilarga munosib javob qaytardi. Italiyalik himoyachi yakunlangan mavsumda Inter bilan ichki chempionatda «dubl» qayd etdi va A Seriyaning eng yaxshi futbolchisi (MVP) sovrinini qoʻlga kiritgan ilk italiyalik oʻyinchiga aylandi. Bu haqda Goal.com xabar beradi.
Dimarco uchun bu muvaffaqiyat oson kechmadi. Atigi 12 oy oldin u faoliyatidagi eng ogʻir davrlardan birini boshdan kechirgan edi. Chempionlar ligasi finalida Pari Sen-Jermen jamoasidan qabul qilingan 0:5 hisobidagi magʻlubiyat va sovrinsiz yakunlangan mavsumdan soʻng, qanot himoyachisi keskin tanqidlar ostida qolgan edi. Biroq 2025-26-yilgi mavsumda u 18 ta golli uzatma va 7 ta gol bilan barchani hayratda qoldirdi.
Cristian Chivu boshqaruvidagi jamoa ham Skudetto, ham Italiya kubogini qoʻlga kiritdi. Sky Sport nashriga bergan intervyusida Dimarco oʻtgan yilgi tanqidlar unga qattiq taʼsir qilganini tan oldi. «Bu faoliyatimdagi eng yaxshi mavsum boʻldi. Mavsum boshida bunday natijalarga erishishimni tasavvur ham qilmagandim. Bu sovrinni nafaqat oilamga, balki oʻtgan yili meni tugagan deb aytganlarga bagʻishlayman», — dedi futbolchi.
Dimarco oʻziga nisbatan aytilgan «uni sotish kerak», «faqat 35 daqiqa oʻynay oladi», «himoyalanishni bilmaydi» degan gaplar ogʻriqli boʻlganini taʼkidladi. Shunga qaramay, u maydonda doim 100 foiz kuch bilan harakat qilishini isbotladi. Milanda tugʻilgan yulduz uchun oʻzining sevimli jamoasi safida bunday yutuqqa erishish alohida ahamiyatga ega.
Italiya futboli tarixida A Seriyaning hozirgi formatidagi MVP sovrinini qoʻlga kiritgan ilk mahalliy oʻyinchi boʻlish Dimarco uchun faxrli ekanini aytdi. «Buni soʻz bilan taʼriflash qiyin. Bu kutilmagan mukofot boʻldi va u yillar davomida qilgan mehnatlarimning mevasidir», — deya qoʻshimcha qildi Inter himoyachisi.
“Zamin”ni Telegramʻda oʻqing!
