Angliyaning amaldagi chempioni «Liverpul» Premer-liganing 29-turida kutilmaganda chempionat autsayderi «Vulverxempton»ga 1:2 hisobida mag‘lub bo‘ldi. Raqib maydonida kechgan bahsda mersisaydliklar yana eng og‘riqli ssenariyga duch keldi — jamoa qo‘shimcha daqiqalarda hal qiluvchi gol o‘tkazib yubordi. «Bo‘rilar» safida g‘alaba to‘pini 90+4-daqiqada Andre kiritdi.
Uchrashuv dramatik tus oldi. Avval 78-daqiqada Rodrigu Gomesh mezbonlarni oldinga olib chiqdi. Oradan ko‘p o‘tmay Muhammad Saloh 83-daqiqada hisobni tenglashtirib, «Liverpul»ni o‘yinga qaytargandek bo‘ldi. Ammo oxirgi so‘z baribir «Vulvz»niki bo‘ldi: Andrening rikoshet bilan darvozaga kirgan zarbasi mehmonlarni navbatdagi alamli yo‘qotishga mahkum qildi.
Eng e’tiborlisi, bu shunchaki bitta mag‘lubiyat emas. The Guardian va Reuters keltirgan statistikaga ko‘ra, «Liverpul» joriy mavsumda Premer-ligada qo‘shimcha daqiqalarda o‘tkazib yuborilgan g‘alaba goli sabab beshinchi bor yutqazdi. Bu esa jamoaning so‘nggi daqiqalardagi barqarorlik muammosi qanchalik og‘irlashayotganini yaqqol ko‘rsatadi.
Xususan avvalroq mersisaydliklar APL doirasida 90-daqiqadan keyin “Manchester Siti”ga (1:2, 25-tur), “Bornmut”ga (2:3, 23-tur), “Chelsi”ga (1:2, 7-tur) va “Kristal Pelas”ga (1:2, 6-tur) shu tarzda mag‘lub bo‘lgan edi.
Arne Slot jamoasi uchun bu holat endi tasodifdek ko‘rinmaydi. Chunki bu mavsum «Liverpul» bir necha bor oxirgi lahzalarda ochko yo‘qotdi. Jamoa yaxshi o‘yin ko‘rsatayotgandek tuyulgan pallada ham, oxirgi daqiqalardagi bir epizod butun mehnatni yo‘qqa chiqarmoqda. Aynan shu jihat mersisaydliklarning bugungi mavsumdagi eng og‘riqli nuqtasiga aylanib ulgurdi.
Bu mag‘lubiyatdan keyin «Liverpul» 48 ochko bilan qoldi va Chempionlar ligasi yo‘llanmasi uchun kurashda ham o‘zini yanada noqulay ahvolga solib qo‘ydi. Ya’ni endi har bir tur mersisaydliklar uchun ikki karra bosim ostida o‘tadi: bir tomonda natija kerak, ikkinchi tomonda esa so‘nggi daqiqalardagi asabiylikni yengish talabi turibdi.
Qisqasi, «Liverpul» bu mavsum yana bir bor o‘ziga tanish ssenariyda quladi: ko‘p mehnat, kech qaytish va oxirida baribir achchiq zarba. Agar bu odat tezda to‘xtatilmasa, mersisaydliklar uchun mavsumning hal qiluvchi qismi yanada og‘ir kechishi mumkin.
“Zamin”ni Telegramʻda oʻqing!
