Husanov 90 daqiqa o‘ynadi: «Siti» «Nyukasl»ni yengib, chorakfinalga chiqdi

Angliya kubogi 1/8 finalida «Manchester Siti» safarda «Nyukasl»ga qarshi maydonga tushib, 3:1 hisobida ishonchli g‘alabani qo‘lga kiritdi. Mezbonlar bahsni faol boshladi va 18-daqiqada Barns hisobni ochib, «Sent-Jeyms Park»ni bir zumda “uyg‘otib” yubordi. Ammo bu gol «shaharliklar»ni to‘xtatib qo‘ya olmadi — aksincha, «Siti» keyingi daqiqalarda o‘yinni o‘z foydasiga burib ketdi.

Birinchi bo‘limning oxirlarida, 39-daqiqada Savinio tabloda muvozanatni tikladi — 1:1. Tanaffusdan keyin esa «Siti» bosimni yanada kuchaytirdi: 47-daqiqada Marmush gol urib, jamoasini oldinga olib chiqdi. Bahs taqdiri deyarli hal bo‘lgan paytda ham mehmonlar to‘xtamadi — 65-daqiqada Marmush yana bir bor darvozani ishg‘ol qilib, dubl qayd etdi va hisobni 1:3 ko‘rinishiga keltirdi.

Bu uchrashuvda O‘zbekiston milliy jamoasi himoyachisi Abduqodir Husanov asosiy tarkibda maydonga tushib, to‘liq 90 daqiqa harakat qildi. Eng muhimi, u yuqori bosimli safar o‘yinida oxirigacha maydonda qolib, jamoasining chorakfinalga chiqishida o‘z hissasini qo‘shdi. Bunday bahslarda to‘liq o‘ynash — himoyachi uchun ham ishonch, ham murabbiylar shtabi tomonidan berilgan katta bahodir.

Shu tariqa, «Manchester Siti» Angliya kubogida navbatdagi bosqich — chorakfinalga yo‘l oldi. «Nyukasl» esa birinchi goldan keyin ustunlikni ushlab tura olmadi va o‘yin ritmini mehmonlarga berib qo‘ydi.

Angliya kubogi. 1/8 final

Nyukasl — Manchester Siti 1:3

Gollar: Barns 18 – Savinio 39, Marmush 47, 65.

Nyukasl: Ramsdeyl, Trippiyer (Bern, 63), Tiav, Botman, Holl, Elanga (Joelinton, 62), Tonali, Uillok, Voltemade (Gordon, 72), Barns, Osula (Vissa, 63).

Manchester Siti: Trafford, Nunes, Husanov, Stounz, Ake, Niko, Reynders, O’Rayli, Savinio (Sherki, 79), Dok-u (Dok-u, 79), Marmush (Semenyo, 73).