Angliya kubogining 1/8 final bosqichida “Manchester Siti” safarda “Nyukasl”ni mag‘lub etib, keyingi bosqichga yo‘l oldi. Ushbu bahsda hamyurtimiz Abduqodir Husanov asosiy tarkibda maydonga tushib, to‘liq 90 daqiqa harakat qildi va himoyadagi ishonchli o‘yini bilan yana bir bor e’tibor markazida bo‘ldi.
Uchrashuvdan keyin angliyalik mutaxassislar va ekspertlar Husanov haqida ijobiy fikrlar bildirishni boshladi. Xususan, sobiq futbolchi Roy Kin o‘zbekistonlik himoyachini juda qisqa, lekin o‘ta aniq ta’rifladi:
“Husanov murabbiylar uchun orzu. Unda kibr yo‘q, kamera uchun o‘ynamaydi.”
Bu gapning tagida katta ma’no bor: Roy Kin kabi qattiqqo‘l va talabchan ekspert har kimni ham bunday “issiq” baholamaydi. Unga ko‘ra, Husanov maydonda o‘zini ko‘rsatish uchun shou qilmaydi, boshini past qilib ishlaydi, vazifasini aniq bajaradi va eng muhimi — jamoa manfaatini birinchi o‘ringa qo‘yadi. Bunday xarakter himoyachi uchun ayniqsa qimmat, chunki mudofaa chizig‘ida har bir xato juda qimmatga tushadi.
Ma’lumot o‘rnida, “shaharliklar”ning navbatdagi bellashuvi yanada katta sahnada bo‘ladi: Chempionlar ligasi doirasida “Manchester Siti” “Real Madrid”ga qarshi maydonga tushadi. Ana o‘sha o‘yin esa Husanov uchun yana bir imtihon: “Nyukasl” safaridan keyin endi Yevropa futbolidagi eng og‘ir raqiblardan biriga qarshi o‘ynash — haqiqiy status tekshiruvi bo‘ladi.
“Zamin”ni Telegramʻda oʻqing!
