FIFA prezidenti Janni Infantino 2026 yilgi jahon chempionati oldidan favoritlar mavzusiga to‘xtalib, Ispaniya milliy jamoasini asosiy da’vogarlar qatorida alohida tilga oldi. Uning fikricha, hozirgi kunda reytingda yuqori o‘rinda borayotgan terma mundialda ham tabiiy ravishda favoritlar ro‘yxatida turishi kerak.
Infantino AS nashriga bergan intervyusida Ispaniyaning kuchli jihatlarini yaxshi bilishlarini ta’kidlab, bu jamoa har doim yirik musobaqalarda e’tibor markazida bo‘lishini aytdi.
«Ispaniya, albatta, boshqa kuchli jamoalar qatori favoritlardan biri. Biz bu jamoaning kuchli tomonlarini yaxshi bilamiz. Reytingda birinchi o‘rinni egallab turgan jamoa jahon chempionatida ham favorit hisoblanishi kerak», — dedi Infantino.
Eslatib o‘tamiz, 2026 yilgi jahon chempionati 11 iyundan 19 iyulgacha AQSH, Kanada va Meksikada bo‘lib o‘tadi. Ushbu mundial tarixda ilk bor uchta mamlakat mezbonligida tashkil etilishi bilan ham alohida ahamiyatga ega.
Qur’a natijalariga ko‘ra, Ispaniya milliy jamoasi H guruhidan joy olgan. Bu guruhda ispanlar Kabo-Verde, Saudiya Arabistoni va Urugvayga qarshi bahs olib boradi. Qog‘ozda qaraganda, guruh “oson”dek ko‘rinishi mumkin, lekin har bir raqibning o‘z uslubi bor: kimdir jismoniy bosim qiladi, kimdir intizomli himoyaga suyanadi, kimdir esa katta turnir tajribasi bilan xavfli.
Shuning uchun Ispaniyaga “favorit” degan yarliq faqat maqtov emas — bu mas’uliyat ham. Chunki reytingda yuqorida turish boshqacha, mundialda o‘sha bosim ostida har o‘yinni natijaga aylantirish esa boshqa “liga”. Ammo Infantino aytgan gapning tagida bitta signal bor: Ispaniyadan katta natija kutilyapti — endi ular bu ishonchni maydonda tasdiqlashi kerak.
“Zamin”ni Telegramʻda oʻqing!
