Yevropa Chempionlar ligasida bahor havosi bilan birga katta intriga ham qaytdi. 1/8 final doirasida “Manchester Siti” navbatdagi sinovini aynan futbol tarixining eng “og‘ir sahnalari”dan biri — “Santyago Bernabeu”da qabul qiladi. Raqib esa odatdagidek — “Real”. Bu juftlik so‘nggi yillarda allaqachon Chempionlar ligasining klassikasiga aylanib ulgurgan.
Yo‘lning boshi “Etihad”dagi ishonchdan boshlangan
“Shaharliklar” qit’aning eng nufuzli musobaqasidagi mavsumni Italiya chempioni “Napoli”ga qarshi 2:0 hisobidagi g‘alaba bilan boshlagan edi. Shu bahsdagi ishonchli harakat, jamoaga kerakli ruhiy ustunlikni berdi. Bu orada Erling Xoland ham musobaqada 50 golga eng tez yetgan futbolchiga aylanib, yana bir katta rekordga qo‘l urdi.
Lekin mavsum o‘rtasida “Siti” uchun ham qattiq davrlar bo‘ldi: o‘z uyida “Bayer”ga 0:2 hisobida mag‘lubiyat, Norvegiyada liga sensatsiyasi “Budyo-Glimt”dan 1:3 hisobida yutqazish — bular jamoa uchun og‘riqli darslar sifatida yodda qoldi.
Guruh bosqichida barqaror qadamlar
Shunga qaramay, umumiy guruh bosqichida Gvardiola shogirdlari bir necha raqibni ortda qoldirdi: “Borussiya Dortmund”, “Vilyarreal” va “Galatasaroy” ustidan g‘alabalar qayd etildi, “Monako” bilan esa 2:2 hisobida durang qayd qilindi.
Ko‘pchilik fikricha, hal qiluvchi palla dekabr oyida “Bernabeu”da “Real”ga qarshi o‘tkazilgan o‘yin bo‘lgan. Rodrigoning erta goliga qaramay, “Siti” o‘sha bahsda tajriba va xotirjamlik ko‘rsatgan: Niko O’Rayli jamoani o‘yinga qaytargan, Xoland esa penaltini aniq bajarib, burilish yasagan. Shu natija “Siti”ga kuchli sakkizlikka kirish imkonini berib, 1/16 final pley-offidan qutqargani ta’kidlanmoqda.
Yana “Real” va yana bir tarixiy seriya
Endi 1/8 finalda “Siti” yana “Real”ga duch keldi. Bu — oxirgi yetti yilda ikki jamoa o‘rtasida bo‘ladigan 12-uchrashuv. Ya’ni bu raqobatda hech narsa “tasodif” emas: har bir detal, har bir epizod bahs taqdirini o‘zgartiradi.
Gvardiola tasdiqlagan 23 nafarlik ro‘yxat
Xosep Gvardiola Ispaniya safari uchun quyidagi tarkibni tasdiqladi:
— Darvozabonlar: Donnarumma, Trafford, Bettinelli.
— Himoyachilar: Nunesh, Alleyn, Husanov, Gexi, Stounz, Dias, Ake, Ayt-Nuri.
— Yarim himoyachilar: Rodri, Niko, O’Rayli, Reynders, Bernardu, Sherki, Foden.
— Hujumchilar: Semeno, Savio, Marmush, Xoland, Dok-u.
Jamoaga eng muhim xabar — Xoland safga qaytdi. Yoshko Gvardiol esa hali ham jarohatini davolatmoqda. So‘nggi haftalarda “Siti”dagi jarohatlar bilan bog‘liq muammolar ancha yumshaganini ham qayd etish mumkin.
Shanba kuni “Nyukasl”ga qarshi o‘yinda dam olgan Xoland Madridga yo‘l olgan tarkibdagi asosiy figuralardan biri bo‘ldi. Shu bilan birga, Mateo Kovachich umumiy mashg‘ulotlarga qaytgan, ammo hali o‘yin amaliyotini to‘liq tiklab ulgurmagani uchun tarkibga kiritilmadi. Riko Lyuis ham to‘piq jarohatidan keyin o‘xshash holatda.
Sariq kartochka “mina”si: bir xato — javob o‘yinisiz qolish
Madriddagi birinchi uchrashuvda har ikki jamoa futbolchilari uchun intizom masalasi ham juda muhim. UYEFA qoidasiga ko‘ra, guruh bosqichidan boshlab uchta sariq kartochka olgan yoki keyingi har qanday toq sonli ogohlantirishga ega bo‘lgan o‘yinchi navbatdagi bahsni o‘tkazib yuboradi. Kartochkalar faqat chorak finaldan keyin “tozalanadi”.
“Real” safida diskvalifikatsiyaga yaqin futbolchilar: Jud Bellingem, Vinisius Junior, Rodrigo, Din Xeysen va Orelen Tchuameni. Alvaro Karreras esa allaqachon to‘rtta ogohlantirishga ega — yana bittasi uni avtomatik chetlatadi.
“Manchester Siti”da esa Niko O’Rayli va Savioni diskvalifikatsiyadan faqat bitta sariq kartochka ajratib turibdi. Demak, “Etihad”dagi javob bahsi uchun har bir daqiqa va har bir harakat hisobda.
Husanov masalasi: muxlislar boshlang‘ich tarkibni kutyapti
Abduqodir Husanov joriy mavsumda Chempionlar ligasida to‘rt bahsda ishtirok etdi. 22 yoshli himoyachi “Napoli”, “Budyo-Glimt” va “Galatasaroy”ga qarshi to‘liq o‘ynagan, “Bayer” bilan bellashuvda esa 65-daqiqada almashtirilgan. “Real” va “Borussiya”ga qarshi o‘yinlarda zaxirada qolgan, “Monako” va “Vilyarreal” bilan to‘qnashuvlarda esa jarohat sabab qaydnomaga kiritilmagan.
Angliya kubogida “Nyukasl”ga qarshi o‘ta yuqori saviyadagi o‘yindan keyin, muxlislar ham, mutaxassislar ham Husanovni “Real”ga qarshi bahsda boshlang‘ich tarkibda ko‘rishni istayapti. Bunday umidlar bekor emas: o‘tgan mavsumda “Bernabeu”da ham u ishonchli harakat qilib, Vinisius Juniorga xavfli vaziyat yaratish imkonini kamaytirgani ta’kidlanadi.
Endi eng asosiy savol: “Bernabeu”dagi bu yangi kechada “Siti” o‘z xotirjamligi va barqarorligini yana bir bor ko‘rsata oladimi? Javobni maydon beradi. Ammo bir narsa aniq — bu bahsda mayda xato ham katta hisobga aylanishi mumkin.
“Zamin”ni Telegramʻda oʻqing!
