UYEFA Chempionlar ligasi 1/8 finalining birinchi bahsida “Real”ning “Manchester Siti” ustidan 3:0 hisobidagi yirik g‘alabasi Madridda katta shov-shuv bo‘ldi. Uchrashuvdan keyin “qaymoqranglilar” bosh murabbiyi Alvaro Arbeloa natija, o‘yin rejasi va jamoaning ruhiy holati haqida o‘z fikrlarini bildirdi.
Arbeloa avvalo shuni ta’kidladi: natija ular kutib turganidan ham yaxshiroq chiqqan. Uning so‘zlariga ko‘ra, “Santyago Bernabeu”da futbolchilarning o‘yindan lazzat olgani va hujumda ham, himoyada ham ishonch bilan harakat qilgani uni quvontirgan. Murabbiy ayniqsa so‘nggi qiyin sinovlardan keyin jamoa aynan shunday g‘alabaga munosib bo‘lganini urg‘ulab o‘tdi.
- "Natija kutganimizdan ham yaxshiroq bo‘ldi.“Santyago Bernabeu”da futbolchilarning o‘yindan zavq olgani meni quvontirdi, ular so‘nggi qiyin sinovlardan keyin bunday g‘alabaga loyiq edi.", - dedi Arbeloa.
Shuningdek, u tashqi muhitda “Real” qudratiga nisbatan shubhalar aytilganini ham esladi. Ammo Arbeloa bunday fikrlarga qisqa va qattiq javob berdi: “Biz ‘Real’miz va bizni kamsitish mumkin emas”. Ya’ni bu g‘alaba faqat tabloda emas, psixologik jihatdan ham “qaymoqranglilar”ning obro‘sini tiklab qo‘yganini u yashirmadi.
Taktik tomondan Arbeloa “Siti”ning o‘yin uslubi va Pep Gvardiola falsafasini yaxshi bilishlarini aytdi. Uning ta’kidlashicha, madridliklar raqibga maydonda bo‘sh hudud qoldirmagan, asosiy uzatma yo‘llarini yopgan va “Siti”ni o‘zining odatiy “paslar orqali yorib kirish” rejasidan uzoqlashtirgan. Murabbiy shu yerda muhim bir detalni ham qayd etdi: “Siti” ko‘p holatda raqibni oldinga chiqarib, keyin tez qarshi hujum bilan jazolashga intiladi. “Real” esa sabr bilan harakat qilib, orqa chiziqka hujum qilish orqali xavfli vaziyatlar yarata olgan.
- "Biz “Siti”ning o‘yin uslubi va Gvardiolaning taktikasini yaxshi bilamiz, u nimaga intilayotganini tushunamiz. Ularga maydonda bo‘sh hudud qoldirmadik va asosiy uzatma yo‘llarini yopdik.
Raqiblar sizni oldinga chiqarib, keyin qarshi hujum qilishga harakat qiladi, ammo sabr bilan o‘ynab va ularning orqa chizig‘iga hujum qilib, xavfli vaziyatlar yarata oldik.", - dedi Arbeloa.
Albatta, bu kechada hisob yanada yirik bo‘lishi ham mumkin edi. Vinisius Junior penaltidan aniq foydalanganida, tablodagi farq yanada kattaroq ko‘rinish olishi ehtimol edi. Ammo Arbeloa uchun asosiysi — jamoaning umumiy ishi va natija.
Murabbiyning eng ta’sirli gaplaridan biri esa Valverde haqida bo‘ldi. Arbeloa urugvaylik xavbekni “zamonaviy Xuanito” deb atadi va uni “Real” futbolchisi qanday o‘ynashi kerakligining tirik namunasi sifatida ta’rifladi. Bu so‘zlar bir o‘yinlik maqtov emas — “ruh, xarakter va jamoa uchun yashash” degan madridchilik falsafasiga berilgan yuqori bahodek eshitildi.
- "Men uchun Valverde — zamonaviy Xuanito, “Real” futbolchisi qanday o‘ynashi kerakligining namunasi", - dedi Arbeloa.
Eslatib o‘tamiz, jamoalar o‘rtasidagi javob uchrashuvi 17-mart kuni Manchesterdagi “Etixad” stadionida bo‘lib o‘tadi. Arbeloa va “Real” uchun esa hozirgi vazifa bitta: birinchi o‘yindagi ustunlikka aldanmay, javob bahsiga ham xuddi 0:0dek tayyorlanish va ishni oxirigacha yetkazish.
“Zamin”ni Telegramʻda oʻqing!
