Taniqli insayder Nikolo Skira ma’lumotiga ko‘ra, Pari Sen-Jermen rahbariyati amaldagi bosh murabbiy Luis Enrike bilan yangi moliyaviy va uzoq muddatli shartnoma bo‘yicha muzokaralarni faol boshlagan.
Ma’lum qilinishicha, hozirda Enrikega taklif qilinayotgan yangi shartnoma ilgarigiga qaraganda sezilarli darajada yaxshilangan va murabbiyning Parij klubida kelgusi yillarda ham yuqori natijalarga erishishi uchun barcha imkoniyatlar yaratilmoqda. Parij klubi rahbariyati uni klubni yuqori cho‘qqilarda ushlab turishga qodir samarali va strategik fikrlaydigan murabbiy sifatida baholamoqda.
Enrikening PSJ bilan amaldagi shartnomasi 2027 yilgacha mo‘ljallangan, ammo murabbiy hali bu muddatdan keyingi kelajak loyihasi va shaxsiy qarorlari haqida yakuniy qaror qabul qilmagan. Bu esa klub va murabbiy o‘rtasidagi muzokaralarning yanada muhim ahamiyatga ega ekanligini ko‘rsatadi.
Enrike 2023 yil iyul oyida PSJ boshqaruvini o‘z zimmasiga olgan va shu vaqt davomida 161 ta o‘yinda murabbiylik qilgan. Uning faoliyati davomida jamoa 113 ta g‘alaba, 25 ta durang va 23 ta mag‘lubiyat qayd etdi. Bu natijalar uni Parij klubining tarixida eng samarali murabbiylardan biri sifatida e’tirof ettirdi.
2024/25 yilgi mavsumda Enrike Parij jamoasi uchun orzu qilingan Liga Chempionlari kubogini qo‘lga kiritdi va klub tarixida abadiy nomini yozib qoldirdi. Ushbu muvaffaqiyat Parij klubi rahbariyatini Enrikening faoliyatini uzoq muddatli davom ettirishga qiziqtirishda asosiy omil bo‘ldi.
Shu bois, yaqin kunlarda yangi moliyaviy va strategik shartnoma bo‘yicha muzokaralar samarali natija berishi kutilmoqda va PSJ muxlislari Enrike qo‘l ostida yana yuqori natijalar ko‘rish imkoniyatiga ega bo‘ladi.
“Zamin”ni Telegramʻda oʻqing!
