Jahon futbolida o‘z o‘rnini topayotgan o‘zbekistonlik himoyachi Abduqodir Husanov yana bir bor xalqaro ommaviy axborot vositalari diqqat markaziga tushdi. Bu safar nufuzli The Athletic nashri uning o‘yini va taʼsiri haqida alohida maqola eʼlon qildi.
Nashrda qayd etilishicha, Abduqodir Husanov nafaqat maydondagi harakatlari, balki ommaviy mashhurligi jihatidan ham afsonaviy Krishtianu Ronaldu bilan taqqoslanmoqda. Mualliflar fikricha, Toshkentda deyarli har kim Husanovni taniydi — odamlar uni futbolga qiziqsa-qiziqmasa ham, uning surati katta reklama bannerlarida namoyon bo‘ladi, shaxsiy hayoti esa doimiy ravishda yangiliklarda yoritiladi.
Maqolada aytilishicha, yosh bo‘lishiga qaramay, Abduqodir Husanov bugungi kunda O‘zbekiston futbolining asosiy simvollaridan biriga aylanib ulgurgan. Ayniqsa, 2026 yilgi jahon chempionati oldidan muxlislar va mutaxassislar unga katta ishonch bildirmoqda.
«Abduqodir Husanov — Krishtianu Ronalduning o‘zbekcha analogi. Poytaxt Toshkentda, The Athletic kim bilan muloqotda bo‘lmasin, Husanovni taniydi va ular futbolga qiziqishi, uni kuzatib borishi muhim emas. Uning yuzini ulkan reklama taxtalarida ko‘rishingiz mumkin, shaxsiy hayotidagi voqealar esa milliy yangiliklarda paydo bo‘ladi. Jahon chempionatidagi barcha umidlar ham «Manchester Siti»ning 22 yoshli markaziy himoyachisi zimmasiga tushmoqda», – deb yozadi The Athletic.
Eslatib o‘tamiz, «Manchester Siti» safida to‘p surayotgan 22 yoshli markaziy himoyachi ushbu mavsum barcha musobaqalarni hisobga olganda 29 ta uchrashuvda maydonga tushdi. Garchi hali gol yoki assist kabi samarali harakatlar qayd etmagan bo‘lsa-da, uning himoyadagi barqaror o‘yini yuqori baholanmoqda.
Yaqinlashib kelayotgan jahon chempionatida esa O‘zbekiston milliy jamoasi ilk bor ishtirok etadi. AQSH, Kanada va Meksika mezbonlik qiladigan ushbu nufuzli turnirda jamoamiz Portugaliya, Kolumbiya va Kongo DR kabi kuchli raqiblarga qarshi bahs olib boradi.
Shu jihatdan qaraganda, Abduqodir Husanov nafaqat himoya chizig‘ining tayanchi, balki butun mamlakat orzu-umidlari jamlangan asosiy figuraga aylanib bormoqda. Endi hammasi uning maydondagi ishonchli o‘yini va bosimni qanday qabul qilishida. Bir so‘z bilan aytganda — spotlight yoqildi, endi shou boshlanadi.
“Zamin”ni Telegramʻda oʻqing!
