Angliya kubogi chorakfinal bosqichida «Manchester Siti» “Liverpul”ni yirik hisobda — 4:0 ko‘rinishida mag‘lub etdi. Ushbu uchrashuvdan keyin jamoaning yordamchi murabbiyi Pep Leynders o‘zbek himoyachisi Abduqodir Husanov haqida juda iliq va samimiy fikrlar bildirdi.
Murabbiyning taʼkidlashicha, Husanovni qayerda ko‘rmasin — mashg‘ulot jarayonidami, klub binolaridami yoki kundalik holatlardami — uning eng birinchi eʼtiborini tortgan jihat bu futbolchining beqiyos tezligidir. Leyndersning so‘zlariga ko‘ra, Husanov shunchalik chaqqon va epchilki, uning harakatlari raqiblar uchun jiddiy muammoga aylanmoqda.
Shu bilan birga, yosh himoyachi faqat jismoniy jihatdan emas, balki ruhiy tomondan ham ancha yetuk ekani qayd etildi. U maydonda xotirjamlikni saqlaydi, vaziyatni to‘g‘ri baholaydi va har bir qarorini aql bilan qabul qiladi. Bu esa himoya chizig‘ida ishonchlilikni yana-da oshiradi.
Leynders ayniqsa, himoyada tezlik omilining naqadar muhim ekanini alohida urg‘uladi. Uning fikricha, aynan shunday xususiyatlar jamoaga raqib hujumlarini bartaraf etishda katta ustunlik beradi. Garchi butun himoya chizig‘i munosib o‘yin namoyish etgan bo‘lsa-da, Husanov o‘zining faolligi va ishonchli harakatlari bilan boshqalardan yaqqol ajralib turgan.
Qolaversa, futbolchining yana bir muhim jihati — uning jasorati. Husanov to‘p bilan oldinga chiqishdan qo‘rqmaydi, hujumni qo‘llab-quvvatlashga intiladi va o‘yinni chuqur tushunib harakat qiladi. Uning maydondagi fikrlash tezligi va o‘yinni “o‘qish” qobiliyati murabbiylar tomonidan yuqori baholanmoqda.
«Har safar Husanovni kuzatganimda, mashg‘ulotlarda bo‘ladimi, koridordami yoki boshqa joydami, birinchi aytadigan gapim “Tezlik” bo‘ladi. Abduqodir shu qadar tezki...
Shu bilan birgalikda u juda xotirjam, aql bilan harakat qiladi va himoyalanadi. Himoya chizig‘ida tezlik bo‘lishi jamoaga katta yordam beradi. Butun himoya chizig‘i yaxshi o‘yin ko‘rsatdi, ammo Husanov alohida ajralib turdi. U to‘p bilan oldinga chiqishdan qo‘rqmaydi, o‘yinni o‘qish qobiliyati yaxshi», - deya Leyndersning so‘zlaridan keltiradi klub rasmiy sayti.
Bunday taʼriflar, albatta, o‘zbek futbol muxlislari uchun ham g‘ururli holat. Abduqodir Husanovning Yevropadagi chiqishlari kun sayin ishonchliroq tus olayotgani esa uning kelajagi yana-da yorqin bo‘lishidan darak beradi. Agar u shu ruhda davom etsa, yaqin yillarda jahon futbolida katta nom qozonishi hech gap emas.
“Zamin”ni Telegramʻda oʻqing!
