Londonning “Arsenal” klubi bosh murabbiyi Mikel Arteta Chempionlar ligasi chorakfinali doirasida Lissabonning “Sporting” jamoasiga qarshi safarda qo‘lga kiritilgan muhim g‘alaba (1:0) haqida o‘z fikrlari bilan o‘rtoqlashdi.
Ispaniyalik mutaxassisning taʼkidlashicha, bu muvaffaqiyat jamoa uchun juda katta ahamiyatga ega bo‘lgan. Uning so‘zlariga ko‘ra, uzoq vaqtdan beri mag‘lubiyat nimaligini bilmayotgan kuchli raqibni o‘z maydonida yengish oson vazifa emas edi. Bu esa “Arsenal” oldida qanchalik murakkab sinov turganini yaqqol namoyon etdi.
"Juda ham xursandman. Chempionlar Ligasi chorakfinalida, safarda, juda uzoq vaqtdan beri mag‘lub bo‘lmayotgan jamoani yengish… Buning barchasi vazifamiz qanchalik og‘ir bo‘lganini ko‘rsatadi", – dedi Arteta.
Arteta uchrashuv davomida jamoasi raqib jarima maydonchasi atrofida ko‘p bor xavfli vaziyatlar yaratganini, biroq hal qiluvchi zarbalarda aniqlik yetishmaganini qayd etdi. Uning fikricha, bunday darajadagi jamoalarga qarshi o‘yinlarda har bir imkoniyatdan maksimal darajada foydalanish talab qilinadi.
"Har safar raqib jarima maydonchasiga yaqinlashganimizda bizga nimadir yetishmasdi. Yanada aniqroq harakat qilishimiz talab qilinardi. Bunday raqib himoyasini yorib o‘tish uchun tez va samarali harakat qilish talab etiladi", – dedi Arteta.
Shu bilan birga, murabbiy futbolchilarning intilishi va sabr-toqatini yuqori baholadi. U o‘yinning so‘nggi daqiqalarida yuz bergan golli epizodni alohida taʼkidlab, ikki hujumchi tomonidan qabul qilingan to‘g‘ri qarorlar jamoaga g‘alabani taqdim etganini aytdi.
"Ikki-uch marta gol urishga juda yaqin keldik, o‘yin oxirida esa ertaknamo epizod yuz berdi. Ikki hujumkor futbolchining ajoyib qarorlari o‘yin bizning foydamizga hal bo‘lishini taʼminladi", – dedi Arteta deya uning so‘zlarini keltiradi UYEFA rasmiy sayti.
Maʼlumot uchun, “Arsenal” va “Sporting” o‘rtasidagi javob uchrashuvi 15 aprel kuni Londondagi “Emireyts” stadionida bo‘lib o‘tadi. Ushbu bahsda qaysi jamoa yarim finalga yo‘l olishi hal bo‘ladi va muxlislar yana bir shiddatli to‘qnashuvga guvoh bo‘lishi kutilmoqda.
“Zamin”ni Telegramʻda oʻqing!
