Yevropa Konferensiyalar ligasining chorakfinal bosqichidagi dastlabki uchrashuvlar futbol ishqibozlari uchun keskin kutilmagan natijalar va ishonchli g‘alabalar bilan yodda qoldi. Bir qator jamoalar maydonda to‘liq ustunlikni namoyon etib, javob o‘yinlari oldidan katta afzallikni qo‘lga kiritdi.
Angliyada «Kristal Pelas» o‘z uyida Italiyaning “Fiorentina” jamoasini qabul qilib, ishonchli tarzda 3:0 hisobida g‘alaba qozondi. Uchrashuvda mezbonlar hujumda juda faol harakat qilib, raqibga deyarli imkoniyat qoldirmadi. Mateta 24-daqiqada hisobni ochgan bo‘lsa, Mitchell 32-daqiqada ustunlikni oshirdi. Qo‘shimcha vaqtda Sarr ham gol urib, yirik hisobni mustahkamladi.
Kristal Pelas — Fiorentina 3:0
Gollar: Mateta 24, Mitchell 32, Sarr 90+1
Ukraina jamoasi “Shaxtyor” ham o‘z maydonida Niderlandiyaning “AZ” klubi ustidan ishonchli g‘alabaga erishdi — 3:0. Uchrashuvning ikkinchi bo‘limida jamoa bosimni kuchaytirib, raqib darvozasini bir necha bor ishg‘ol qildi. Pedrinio 72-daqiqada birinchi golni urgan bo‘lsa, Alison 81 va 83-daqiqalarda dubl qayd etdi.
Shaxtyor — AZ 3:0
Gollar: Pedrinio 72, Alison 81, 83.
Germaniyada bo‘lib o‘tgan bahsda “Mayns” Fransiyaning “Strasburg” jamoasini 2:0 hisobida mag‘lub etdi. Dastlabki daqiqalardayoq nemis klubi ustunlikni qo‘lga kiritdi: Sano 11-daqiqada hisobni ochdi, Posh esa 19-daqiqada ikkinchi golni kiritib, jamoasining g‘alabasini mustahkamladi.
Mayns — Strasburg 2:0
Gollar: Sano 11, Posh 19.
Ispaniyadagi uchrashuvda «Rayo Valekano» o‘z maydonida Gretsiyaning “AYEK” jamoasini 3:0 hisobida mag‘lub etdi. Axomash 2-daqiqada tezkor gol urib, uchrashuvni jonlantirdi. Lopes birinchi bo‘limga qo‘shib berilgan vaqtda hisobni oshirgan bo‘lsa, Palason 74-daqiqada yakuniy nuqtani qo‘ydi.
Rayo Valekano — AYEK 3:0
Gollar: Axomash 2, Lopes 45+2, Palason 74
Endi barcha jamoalarni javob uchrashuvlari kutib turibdi. Qarshi o‘yinlar bir haftadan so‘ng o‘tkazilib, yarim finalga yo‘l oladigan ishtirokchilarni aniqlab beradi.
Futbol muxlislari uchun intriga yana-da qiziydi — qaysi jamoalar ustunligini saqlab qoladi, qaysilari kambek qila oladi, bu savollarga tez orada javob olamiz.
“Zamin”ni Telegramʻda oʻqing!
