“Real” bosh murabbiyi Alvaro Arbeloa La Liganing 31-turida “Jirona”ga qarshi uchrashuvda qayd etilgan 1:1 hisobidagi durangdan keyin jamoa chempionlik poygasidan chiqib ketmaganini taʼkidladi.
Mutaxassisning aytishicha, mavsumda hammasi hali tugamagan va jamoa oxirgi imkoniyatgacha kurashni davom ettiradi. Uning fikricha, haqiqiy mag‘lubiyat faqat chempionatdagi imkoniyatlar butunlay yo‘qolgan paytdagina tan olinishi mumkin.
Arbeloa futbolchilardan maksimal darajada kuch sarflab o‘ynashni talab qilib, har bir o‘yinni finaldek qabul qilish kerakligini bildirdi.
“Biz faqat chempionlikni rasman boy berganimizdagina mag‘lub bo‘lgan hisoblanamiz. Hozir esa kurash davom etmoqda. Oxirigacha yaxshi o‘ynab, har bir uchrashuvda maksimal natija uchun harakat qilishimiz kerak”, — dedi u.
Hozirgi vaziyatga ko‘ra, turnir jadvalida ikkinchi o‘rinda borayotgan madridliklar 31 o‘yindan so‘ng 70 ochko to‘plagan. Mavsum yakunlanishiga 7 tur qolgan. Peshqadam “Barselona” esa 30 o‘yindan keyin 76 ochko bilan birinchi o‘rinda bormoqda.
Shunday qilib, chempionlik poygasi hali ham qizg‘in davom etmoqda va har bir tur natijasi hal qiluvchi ahamiyat kasb etishi mumkin.
“Zamin”ni Telegramʻda oʻqing!
