Italiya milliy jamoasining sobiq futbolchisi Dino Badjo 1990-yillar A Seriyasi haqida xotiralari bilan o‘rtoqlashdi. Uning taʼkidlashicha, o‘sha davrda Italiya chempionati dunyo futbolida eng kuchli va nufuzli ligalardan biri bo‘lgan.
“Hamma aynan shu yerga kelishni istardi. Eng yuqori darajadagi xorijlik futbolchilar shu yerda to‘p surishardi. Balki ular soni hozirgidan kamroq bo‘lgandir, lekin barchasi haqiqiy jahon darajasidagi yulduzlar edi. Klublar ham futbolchilarni tanlashda ancha qattiq talab qo‘yardi,” — deydi Badjo.
Uning so‘zlariga ko‘ra, o‘sha paytda A Seriya Angliya Premyer-ligasi bilan bir qatorda eng raqobatbardosh chempionatlardan biri hisoblangan. Italiya futboli haqiqiy “oltin davr”ni boshdan kechirgan.
Badjo o‘sha yillardagi yulduzlarni eslab, “Milan” tarkibida Marko van Basten, Rud Gullit va Frank Raykard kabi gollandiyalik afsonalar to‘p surganini, “Inter”da esa Lotar Matteus, Andreas Breme va Yurgen Klinsmann kabi nemis yulduzlari o‘ynaganini taʼkidlaydi. Shuningdek, 80-yillardagi braziliyalik ustalar — Ziko va Paulo Falkao ham Italiya futboliga katta taʼsir ko‘rsatgan.
Uning fikricha, o‘sha davrda “Oltin to‘p” sohiblari ham A Seriyani boyitib turgan. Hozirgi kunda esa vaziyat o‘zgargan: eng yaxshi futbolchilar Ispaniya, Angliya yoki Fransiya chempionatlarini tanlamoqda, Italiyaga esa ko‘proq boshqa variantlardan qolganlar yo‘l olishmoqda.
Badjoning so‘zlari AS nashri tomonidan iqtibos sifatida keltirilgan.
“Zamin”ni Telegramʻda oʻqing!
