Angliya Premyer-ligasining 32-turidan o‘rin olgan “Chelsi” — “Manchester Siti” bahsi kutilganidek katta qiziqish va yuqori tempdagi kurashlar ostida o‘tdi. Biroq uchrashuv yakunida mehmonlar — “shaharliklar” o‘z ustunligini to‘liq namoyon etib, ishonchli 3:0 hisobida g‘alaba qozonishga muvaffaq bo‘ldi.
Bellashuvning birinchi bo‘limida har ikki jamoa ehtiyotkorlik bilan harakat qildi. “Chelsi” o‘z maydonida o‘ynayotgan bo‘lsa-da, raqib hujumlariga qarshi muvozanatni saqlashga urinib ko‘rdi. “Manchester Siti” esa odatdagidek to‘p nazoratini o‘z qo‘liga olib, asta-sekin raqib darvozasiga xavf sola boshladi.
Hisob ikkinchi bo‘lim boshida ochildi. 51-daqiqada O‘Rayli aniq va sovuqqon zarba bilan darvozani ishg‘ol qilib, jamoasini oldinga olib chiqdi. Bu goldan keyin “Siti”ning ishonchi yana-da ortdi va ular bosimni kuchaytirishda davom etdi.
Oradan ko‘p o‘tmay, 57-daqiqada Gexi jamoasining ustunligini yana-da mustahkamladi. U standart vaziyatdan unumli foydalanib, hisobni 2:0 ko‘rinishiga keltirdi. “Chelsi” himoyasi esa bu vaziyatda ancha noaniq harakat qildi.
Uchrashuv taqdiri deyarli hal bo‘lgan pallada, 68-daqiqada Doku o‘zining tezkorligi va individual mahoratini namoyon etgan holda uchinchi golni kiritdi. Shu tariqa u bahsga yakuniy nuqtani qo‘ydi va “shaharliklar”ning yirik g‘alabasini taʼminladi.
Mazkur o‘yinda O‘zbekiston milliy terma jamoasi himoyachisi Abduqodir Husanov ham alohida eʼtibor markazida bo‘ldi. U uchrashuvni asosiy tarkibda boshlab, 90 daqiqa davomida ishonchli harakat qildi va himoyada barqaror o‘yin ko‘rsatdi. Bu esa uning jamoadagi o‘rni tobora mustahkamlanayotganini ko‘rsatadi.
APL. 32-tur
Chelsi — Manchester Siti 0:3
Gollar: O‘Rayli 51, Gexi 57, Doku 68.
Chelsi: Sanches, Gyusto (Acheampong, 88), Fofana, Xato, Kukurelya, Kaysedo (Essugo, 82), Santos (Garnacho, 67), Palmer, Estevao (Laviya, 68), Netu, Joau Pedro (Delap, 81).
Manchester Siti: Donnarumma, Nunesh, Husanov, Gexi, O‘Rayli (Ait-Nuri, 64), Rodri, Silva (Kovachich, 81), Semenyo, Sherki (Foden, 76), Doku (Savinyo, 76), Holand.
Ushbu muhim g‘alabadan so‘ng “Manchester Siti” o‘z ochkolari sonini 64 taga yetkazib, peshqadam “Arsenal” bilan farqni 6 ochkogacha qisqartirdi. Qolaversa, Gvardiola shogirdlarining zaxirasida yana bir o‘yin borligi intrigani yana-da oshirmoqda.
“Chelsi” esa bu mag‘lubiyatdan keyin 48 ochko bilan turnir jadvalida 6-o‘rinda qolib ketdi va Chempionlar ligasi yo‘llanmasi uchun kurashda o‘z imkoniyatlarini murakkablashtirib qo‘ydi.
Umuman olganda, “Manchester Siti” bu bahsda klass va tajriba jihatidan ustun ekanini ko‘rsatdi. Endi chempionlik poygasi yana-da qizg‘in tus oladi — va intriga, aytish kerakki, hali tugamagan.
“Zamin”ni Telegramʻda oʻqing!
