Madridning “Real” klubi bosh murabbiyi Alvaro Arbeloa o‘zining jamoadagi kelajagi haqidagi savollarga javob berib, hozircha bu mavzu uni umuman bezovta qilmayotganini taʼkidladi.
Uning so‘zlariga ko‘ra, butun eʼtibor hozirgi mavsumning qolgan o‘yinlariga qaratilgan. Arbeloa uchun ayniqsa navbatdagi uchrashuv muhim ahamiyatga ega ekanini qayd etdi.
— Men o‘z kelajagim haqida umuman qayg‘urmayapman. Hozir men uchun faqat qolgan yetti uchrashuv muhim, ayniqsa ertangi o‘yin. Hammasi shu haqda, — dedi u.
Maʼlumki, Arbeloa joriy yilning yanvar oyida “Real Madrid” bosh murabbiyi etib tayinlangan va bu lavozimda Xabi Alonsoni almashtirgan.
31-turdan so‘ng “qaymoqranglilar” Ispaniya chempionati jadvalida 70 ochko bilan 2-o‘rinda bormoqda. Jamoa esa peshqadam “Barselona”dan 9 ochkoga ortda qolmoqda.
Yevropa maydonida esa “Real” uchun mavsum omadli kechmagan. Madridliklar Chempionlar Ligasidan chiqib ketgan bo‘lib, Myunxenning “Bavariya” jamoasiga har ikki o‘yinda ham mag‘lubiyatga uchragan.
Qisqasi, Arbeloa bosimga qaramasdan diqqatni maydonga qaratmoqda. Muxlislar esa mavsum oxirida “Real” qanday natija bilan yakunlaydi, degan savolga javob kutishmoqda.
“Zamin”ni Telegramʻda oʻqing!
