UFC jahon chempioni Iliya Topuriya yana bir bor keskin bayonoti bilan jamoatchilik diqqat markaziga tushdi. Bu safar u oktagondagi ehtimoliy raqiblaridan biri sifatida koʻrilayotgan Arman Sarukyan haqida juda qattiq va bahsli fikrlar bildirdi.
Topuriyaning soʻzlariga koʻra, Tsarukyanning xatti-harakatlari va fikrlash uslubi uni jiddiy hayratga solgan. Chempion raqibini nafaqat sport jihatidan, balki shaxsiy xulqi va ommaviy axborot vositalaridagi obrazi uchun ham tanqid qildi. Uning taʼkidlashicha, internetda Sarukyan haqida tarqalayotgan materiallar uning yetuk sportchiga xos boʻlmagan munosabatini namoyon qilmoqda.
— U meni hayratga soldimi? Ha, lekin uning janglari bilan emas, balki oʻzini qanday tutayotgani bilan. Uning harakatlari bolalarcha, fikrlashi esa yetarlicha jiddiy emas. Internetda koʻrayotganlarimning barchasi men uchun tushunarsiz va kulgili tuyuladi. Bunday insonga kim jiddiy qaraydi? — dedi Topuriya.
Shu bilan birga, u Tsarukyanning oʻzini boy inson sifatida koʻrsatishga urinishiga ham keskin munosabat bildirdi. Chempionning fikricha, haqiqiy boylik oʻzini koʻz-koʻz qilish bilan emas, balki harakat va natija bilan namoyon boʻladi.
— Kimdir oʻzini boydek koʻrsatib, pullarini namoyish qilsa, bu menga yoqmaydi. Chunki bu haqiqiy boylik emas. Aksincha, bu insonning ichki zaifligini koʻrsatadi. Birodar, sen hatto boy ham emassan. Shunchalik qashshoqsanki, otangning pulini sarflayapsan. Agar sen boshqalarga oʻzingni isbotlashga urinib yursang, demak hali yetarlicha kuchli emassan. Nima demoqchiman, tushunyapsanmi? Haqiqiy chaqaloq, — deya qoʻshimcha qildi u.
Topuriyaning ushbu keskin bayonotlari MMA muxlislari oʻrtasida keng muhokamalarga sabab boʻldi. Ayrimlar uning gaplarini qoʻllab-quvvatlasa, boshqalar buni ortiqcha emotsional chiqish deb baholamoqda.
Bir narsa aniq: bu kabi bayonotlar oktagondagi ehtimoliy jangga boʻlgan qiziqishni yanada oshiradi. Endi muxlislar bu ikki jangchi oʻrtasidagi mojaro ringda qanday yakun topishini katta qiziqish bilan kutishmoqda.
