Kelasi mavsumdan boshlab Oʻzbekiston klublari uchun Osiyo maydonida yangi imkoniyatlar ochilmoqda. Endilikda mamlakatimizga Elit Osiyo Chempionlar ligasi uchun 1+1 formatda yoʻllanma ajratiladi va bu mahalliy klublar uchun xalqaro sahnada oʻzini namoyon qilish imkoniyatini yanada kengaytiradi.
Maʼlum boʻlishicha, yoʻllanmalar taqsimoti quyidagicha shakllantirilgan: «Neftchi» jamoasi toʻgʻridan-toʻgʻri Elit OCHL guruh bosqichida ishtirok etadi. «Paxtakor» esa musobaqaning saralash bosqichidan qatnashib, asosiy turnirga chiqish uchun kurash olib boradi. «Nasaf» esa OCHL 2 turnirida yurtimiz sharafini himoya qiladi.
Eng qiziq ssenariy shundaki, agar «Paxtakor» saralash bosqichidan oʻta olmasa, u holda jamoa OCHL 2 turniriga yoʻnaltiriladi. Bu esa Oʻzbekiston nomidan mazkur musobaqada bir vaqtning oʻzida ikki klub ishtirok etishiga sabab boʻladi.
Mutaxassislar fikricha, bunday format mahalliy klublar uchun katta imkoniyat boʻlib, futbolchilarning tajribasini oshirish, xalqaro maydonda raqobatni kuchaytirish hamda mamlakat futboli nufuzini yuksaltirishga xizmat qiladi.
Qisqasi, yangi mavsumda Oʻzbekiston klublari Osiyo arenasida yanada faol va keng koʻlamda ishtirok etishi kutilmoqda. Muxlislar esa jamoalarimizdan munosib natijalar va yorqin oʻyinlar kutib qolmoqda.
“Zamin”ni Telegramʻda oʻqing!
