"Real Madrid" hujumchisi Kilian Mbappe "Real Betis"ga qarshi o'yinda jarohat olib, maydonni tark etdi. 1:1 hisobida yakunlangan bahsning so'nggi daqiqalarida fransiyalik yulduz chap oyog'idagi og'riq sababli almashtirishni so'radi. Bu haqda Goal.com xabar beradi.
Dastlabki tibbiy ko'rik natijalari biroz umidli ko'rinmoqda. Jurnalist Serjio Kirantening xabar berishicha, ultratovush tekshiruvi mushaklardagi jarohat kutilganidan yengilroq ekanini ko'rsatgan.
Biroq yakuniy tashxis dushanba kungi MRT tekshiruvidan so'ng ma'lum bo'ladi.
Ushbu jarohat Madrid klubi uchun o'ta noqulay vaqtga to'g'ri keldi. Jamoa 10 may kuni "Barselona"ga qarshi muhim o'yinda maydonga tushishi kerak.
Shuningdek, yozda Shimoliy Amerikada bo'lib o'tadigan Jahon chempionati oldidan Fransiya terma jamoasi muxlislari ham xavotirga tushgan.
Bosh murabbiy Alvaro Arbeloa futbolchining holati bo'yicha aniq muddatlarni ayta olmadi. Uning so'zlariga ko'ra, Mbappe o'yindan so'ng to'g'ri kiyinish xonasiga yo'l olgan va keyingi kunlardagi holatiga qarab qaror qabul qilinadi.
Hozircha Mbappening 3 may kuni "Espanyol"ga qarshi bahsda ishtirok etmasligi deyarli aniq. Klub shifokorlari hujumchini mavsumning hal qiluvchi qismiga va xalqaro turnirga tayyorlash uchun bor imkoniyatni ishga solmoqda.
“Zamin”ni Telegramʻda oʻqing!
