Yevropa Chempionlar ligasi yarim finalining dastlabki uchrashuvi doirasidagi «PSJ» va «Bavariya» jamoalari o'rtasidagi bahsni boshqaradigan hakamlar brigadasi ma'lum bo'ldi. UEFA ushbu mas'uliyatli o'yinni shveytsariyalik Sandro Shererga ishonib topshirdi. Bu haqda Goal.com xabar beradi.
Vinsent Kompani boshchiligidagi «Bavariya» Parijdagi «Park de Prens» stadionida 2020-yildan buyon ilk bor final yo'llanmasini qo'lga kiritish uchun maydonga tushadi. Biroq Shererning tayinlanishi Myunxen klubi muxlislarida biroz xavotir uyg'otmoqda.
Sherer faoliyati davomida «Bavariya» ishtirokidagi ikki o'yinni boshqargan. Agar 2020/21-yilgi mavsumda «Lokomotiv» ustidan qozonilgan 2:0 hisobidagi g'alaba ijobiy xotira bo'lsa, o'tgan mavsumdagi holat boshqacha kechgan.
O'tgan yili chorak finalda «Inter»ga qarshi o'z uyida 1:2 hisobida imkoniyatni boy bergan myunxenliklar aynan Sherer hakamligida o'ynashgan edi. O'shanda hakamning harakatlarida xato bo'lmasa-da, natija nemis klubining musobaqadan chiqib ketishiga zamin yaratgan.
Shu bilan birga, «Borussiya Dortmund» ushbu hakam boshchiligida «Lill» ustidan 2:1 hisobida g'alaba qozonib, keyingi bosqichga o'tgan edi. O'shanda fransuz klubi prezidenti Olivye Letang hakamni faqat nemis tilida gaplashganlikda ayblab, norozilik bildirgan.
Hozirda 37 yoshda bo'lgan Sandro Sherer o'zining futbolchilik o'tmishi haqida gapirar ekan, maydonda juda murakkab xarakterga ega bo'lganini tan oladi. U o'zini «isyonkor» va «boshqarish qiyin bo'lgan» o'yinchi deb ta'riflagan.
“Zamin”ni Telegramʻda oʻqing!
