FIFA 2026 yilgi jahon chempionati oldidan yana bir muhim va qiziqarli yangilikni muhokamaga qoʻymoqda. Maʼlum boʻlishicha, turnir davomida yigʻiladigan sariq kartochkalar boʻyicha amaldagi diskvalifikatsiya tartibi qayta koʻrib chiqilishi mumkin.
Manbalarga koʻra, yangi taklifga asosan, musobaqa davomida olingan sariq kartochkalar ikki bosqichda “tozalanadi”. Yaʼni, avval guruh bosqichi yakunlanganidan keyin, keyin esa chorak finaldan soʻng kartochkalar bekor qilinishi rejalashtirilmoqda. Bu oʻzgarish futbolchilar uchun katta yengillik boʻlishi mumkin, chunki hal qiluvchi oʻyinlarda yetakchi futbolchilarning diskvalifikatsiya sabab chetda qolishi xavfi kamayadi.
Bu masala Kanadaning Vancouver shahrida boʻlib oʻtadigan FIFA Kengashi yigʻilishida atroflicha muhokama qilinadi. Qaror qabul qilinsa, bu jahon chempionati tarixidagi eng muhim reglament oʻzgarishlaridan biriga aylanishi ehtimoldan holi emas.
Yangi qoidalarni joriy etish ortida asosiy sabab ham bor — turnir formati kengaymoqda. Ilk bor 48 ta terma jamoa ishtirok etadigan jahon chempionatida qoʻshimcha pley-off bosqichi, yaʼni 1/16 final paydo boʻladi. Bu esa oʻyinlar soni ortishi, raqobat kuchayishi va albatta kartochkalar soni ham koʻpayishini anglatadi.
Muxlislar uchun yana bir qiziq nuqta — Oʻzbekiston milliy terma jamoasining raqiblari. “K” guruhida vakillarimiz Kolumbiya, Portugaliya hamda Kongo Demokratik Respublikasi kabi jiddiy raqiblar bilan kuch sinashadi. Bu guruhni oson deyish qiyin, ammo imkoniyatlar ham yoʻq emas.
Agar yangi qoidalar tasdiqlansa, bu Oʻzbekiston termasi uchun ham qoʻshimcha plyus boʻlishi mumkin. Chunki qisqa turnirlarda har bir kartochka katta rol oʻynaydi. Endi esa futbolchilar erkinroq harakat qilishi, ortiqcha ehtiyotkorlikdan xalos boʻlishi mumkin.
Qisqasi, 2026 yilgi mundial nafaqat ishtirokchilar soni, balki qoidalari bilan ham mutlaqo yangi bosqichga chiqmoqda. Endi hammasi FIFA qarorlariga bogʻliq. Bir narsa aniq — bu turnir oddiy emas, tarixiy boʻladi.
“Zamin”ni Telegramʻda oʻqing!
