Ispaniya La Ligasida chempionlik masalasi hal boʻlish arafasida. “Barselona” jamoasi bugunning oʻzidayoq rasman mamlakat chempioniga aylanishi mumkin.
34-tur doirasida Hans-Diter Flik shogirdlari mehmonda “Osasuna”ni 2:1 hisobida magʻlub etib, muhim uch ochkoni qoʻlga kiritdi. Bu gʻalaba kataloniyaliklarga turnir jadvalida yanada mustahkam ustunlik berdi.
Ayni paytda “Barselona” 14 ochko farq bilan “Real Madrid”dan ilgarilab ketgan. Madridliklarda zaxirada yana bitta oʻyin mavjud boʻlsa-da, vaziyat juda jiddiy tus olgan.
Bugun tunda “qaymoqranglilar” oʻz maydonida “Espanyol”ga qarshi bahs olib boradi. Agar Alvaro Arbeloa boshchiligidagi jamoa ushbu oʻyinda ochko yoʻqotsa, “Barselona” rasman La Liga chempioni sifatida eʼlon qilinadi.
Shu bois bugungi oʻyin nafaqat “Real” uchun, balki butun chempionlik poygasi taqdiri uchun hal qiluvchi ahamiyat kasb etadi. Barcha nigohlar Madriddagi bahsga qaratilgan — chunki aynan shu uchrashuv chempion nomi aniqlanishiga sabab boʻlishi mumkin.
“Zamin”ni Telegramʻda oʻqing!
