Bavariya yozgi transfer oynasi uchun o‘zining ilk xaridini deyarli yakunladi. Klub Gambino Stars Africa akademiyasidan ijaraga olingan yosh yarim himoyachi Bara Sapoko Ndiayeni to‘liq transfer qilishga qaror qildi. 18 yoshli futbolchi kelasi mavsumdan boshlab asosiy jamoa tarkibiga jalb etilishi kutilmoqda. Bu haqda Goal.com xabar beradi.
Ushbu transfer tashabbuskori bosh murabbiy Vincent Kompany hisoblanadi. Mutaxassis futbolchini Grasshoppers Zurich jamoasiga qarshi o‘rtoqlik uchrashuvida payqab qolgan va uning iqtidoriga yuqori baho bergan. Ndiaye 2025-yil davomida Bavariya zaxira va U19 jamoalari bilan mashg‘ulotlarda qatnashib, o‘zini ko‘rsatishga muvaffaq bo‘ldi.
Aprel oyi o‘rtalarida Bundesligadagi debyutini nishonlagan yosh futbolchi, jarohatlarga qaramay, allaqachon to‘rt marta maydonga tushishga ulgurdi. Sport direktori Christoph Freund futbolchining jamoaga tez moslashganini ta’kidlab, uning maydondagi va kiyinish xonasidagi ijobiy ta’sirini alohida e’tirof etdi.
Vincent Kompany Ndiayening tezlik ko‘rsatkichlaridan hayratda ekanini yashirmadi. Mashg‘ulotlar davomida futbolchi soatiga 36 km tezlik qayd etib, klub rekordini o‘rnatdi. Murabbiy uning kelajagi porloq ekaniga va jamoa o‘yiniga katta foyda keltirishiga ishonch bildirmoqda.
“Zamin”ni Telegramʻda oʻqing!
