Arsenal o'z tarixida ikkinchi marta Chempionlar ligasi finaliga yo'l oldi. Emirates stadionida kechgan keskin bahsda Bukayo Sakaning goli jamoaga umumiy 2:1 hisobidagi g'alabani taqdim etdi va Atletiko Madrid yarim finalda musobaqani tark etdi. Bu haqda Goal.com xabar beradi.
O'yin yakunlangach, maydonda kutilmagan mojaro yuz berdi. Atletiko Madrid himoyachisi Marc Pubill Viktor Gyokeresga nisbatan tajovuzkor harakat qilgach, ikki jamoa o'yinchilari o'rtasida to'qnashuv kelib chiqdi. Ushbu vaziyatda zaxirada qolgan Gabriel Jesus raqib futbolchisi Marc Pubillning yuziga urgani tasvirlarda yaqqol ko'ringan.
Vaziyatni Declan Rice va Myles Lewis-Skelly kabi futbolchilar tinchlantirishga harakat qilishdi va Pubillni maydonni tark etishga ko'ndirishdi. Atletiko Madrid futbolchilarining asabiylashishiga Viktor Gyokeresning o'yin davomidagi faol harakatlari sabab bo'lgani aytilmoqda.
Mikel Arteta o'yindan so'ng shogirdlarining mehnatini yuqori baholadi. "Bu aqlbovar qilmas oqshom bo'ldi. 20 yillik tanaffusdan so'ng yana Chempionlar ligasi finalidamiz. Muxlislarimiz yaratgan muhit va yigitlarning fidoyiligi tarixiy natijaga olib keldi", - dedi bosh murabbiy.
Endi Arsenal finalda Budapeshtda Pari Sen-Jermen yoki Bavariya jamoalaridan biriga qarshi maydonga tushadi. Arteta jamoasi o'z tarixidagi ilk sovrin uchun kurash olib borishga tayyorgarlik ko'rmoqda.
“Zamin”ni Telegramʻda oʻqing!
