Assalomu alaykum, aziz saytimiz o‘quvchilari va futbol ishqibozlari! «Manchester Siti»da 2025 yilning 20 yanvarida Abduqodir Husanovning transferi bilan boshlangan yangilanish jarayoni yaqinlashib kelayotgan yoz faslida ham qizg‘in davom etadi. Jamoaning sport direktori Ugu Viana nafaqat tajribali faxriylar, balki yangi kelgan bo‘lsa-da, Pep Gvardiolaning asosiy rejalaridan muqim joy ololmagan futbolchilar bilan xayrlashishga tayyorlanmoqda. Zamin.uz «shaharliklar» lageridagi eng so‘nggi o‘zgarishlarni taqdim etadi.
Tijani Reynders: Italiyaga qaytish yaqinmi?
Jamoani tark etishi mumkin bo‘lgan nomzodlar orasida eng ko‘p tilga olinayotgan ism — Tijani Reyndersdir. 2025 yilning iyunida «Milan»dan 45 million funt sterling evaziga ko‘chib o‘tgan niderlandiyalik yarim himoyachi Angliyadagi faoliyatini juda muvaffaqiyatli boshlagan edi. Xususan, uning avgust oyida «Vulverxempton»ga qarshi bahsdagi goli va uzatmasi ko‘pchilikda katta umid uyg‘otgan. Biroq 2026 yilga kelib, Reynders uchun qiyinchiliklar boshlandi. Hozirda Rayan Sherki Gvardiola hujumlarining asosiy «dirijori»ga aylangach, Tijanining asosiy tarkibdagi o‘rni va ahamiyati keskin kamaydi.
«Yuventus» va Spallettining qiziqishi
Ayni paytda 27 yoshli futbolchiga Turinning «Yuventus» klubi jiddiy qiziqish bildirmoqda. Jamoa bosh murabbiyi Luchano Spalletti kelasi mavsumda yarim himoyani kuchaytirish uchun aynan Reynders nomzodini ma’qul ko‘rmoqda. Biroq Italiyaga qaytish va doimiy o‘yin amaliyotiga ega bo‘lish uchun futbolchi Manchesterdagi 7 million yevrolik yillik maoshining kamayishiga rozi bo‘lishi kerak. Agar Reyndersning o‘zi ketishni istasa, «Siti» rahbariyati unga hech qanday to‘sqinlik qilmasligi aytilmoqda.
Tarkibdagi boshqa yo‘qotishlar va yangilanishlar
Ugu Viana boshchiligidagi sport bo‘limi sermahsul transfer kampaniyasiga hozirlik ko‘rmoqda. Jamoaning ko‘p yillik yetakchilari Bernardu Silva va Jon Stounz mavsum yakunlangach klubni tark etishi allaqachon aniq bo‘ldi. Shu bilan birga, Jeyms Trafford, Manuel Akanji, Jek Grilish, Umar Marmush, Savio, Riko Lyuis va Rodri kabi futbolchilarning taqdiri ham so‘roq ostida turibdi. Ularning aksariyati ko‘proq maydonga tushish uchun boshqa jamoaga o‘tishga rozilik bergan. Yaxshi xabar shundaki, Fil Foden klub bilan yangi kelishuvga erishdi va yana kamida to‘rt yil Manchesterda qoladigan bo‘ldi.
Abduqodir Husanov: Grantlar orzusi, «Siti»ning devori
Shu kunlarda Abduqodir Husanov atrofidagi xabarlar ham tinmayapti. Futbol eksperti Kolin Xendrining ma’lum qilishicha, o‘zbek himoyachisi o‘z o‘yini bilan «Real», «Barselona» va «Bavariya» kabi dunyo grandlarining diqqat markaziga tushgan. Ammo transfer mutaxassislari bir fikrda yakdil: Abduqodirning «Manchester Siti» mudofaasidagi o‘rni va ta’siri shu qadar yuqoriki, klub uni hech qanday holatda qo‘yib yubormoqchi emas.
Jahon futbolidagi eng qaynoq va qiziqarli voqealarni Zamin.uz saytida kuzatishda davom eting.
“Zamin”ni Telegramʻda oʻqing!
