Manchester Yunayted himoyachisi Luke Shaw o'z faoliyatida birga to'p surgan eng buyuk futbolchilar haqida gapirib berdi. U ayniqsa Cristiano Ronaldo'ning professionalizmi va Zlatan Ibrahimovic'ning g'alabaga bo'lgan o'ta agressiv intilishidan hayratda qolganini yashirmadi. Bu haqda Goal.com xabar beradi.
Shaw'ning ta'kidlashicha, Cristiano Ronaldo'ning mashg'ulotlardagi tartibi va o'z ustida ishlashi unga katta taassurot qoldirgan. Portugaliyalik yulduzning mashg'ulotdan oldin va keyingi tayyorgarlik jarayonlari uning nima uchun uzoq yillar davomida dunyoning eng yaxshisi bo'lib qolganini yaqqol ko'rsatib turadi.
Zlatan Ibrahimovic haqida gapirar ekan, himoyachi shved hujumchisining g'alaba qozonish mentaliteti o'zgacha bo'lganini qayd etdi. Shaw'ning so'zlariga ko'ra, Zlatan hatto oddiy mashg'ulot o'yinlarida ham mag'lubiyatni qabul qila olmasdi va jamoadoshlaridan ham maksimal natija talab qilardi.
"U haqiqatan ham agressiv edi, lekin jamoaga aynan shunday xarakterli futbolchilar kerak. Uning g'alabaga bo'lgan chanqoqligi barchamizga motivatsiya berardi", — deya qo'shimcha qildi Luke Shaw.
“Zamin”ni Telegramʻda oʻqing!
