Mikel Arteta Bukayo Sakaning oʻziga xos "aura"ga ega boʻlganini va bu fazilat Arsenalning Angliya Premer-ligasi hamda Chempionlar ligasidagi tarixiy gʻalabalari uchun muhim ahamiyat kasb etishini taʼkidladi. Murabbiy oʻz tarbiyalanuvchisini raqib himoyachilarida qoʻrquv uygʻotadigan va oʻyin taqdirini bir lahzada oʻzgartira oladigan haqiqiy yetakchi sifatida baholadi. Bu haqda Goal.com xabar beradi.
Joriy mavsum davomida turli jarohatlar bilan kurashganiga qaramay, 24 yoshli vinger mavsumning hal qiluvchi pallasida ajoyib sport formasiga kirdi. Saka yaqinda Atletiko Madrid darvozasiga gʻalaba toʻpini kiritib, Arsenalni 20 yildan soʻng Chempionlar ligasi finaliga olib chiqishda katta hissa qoʻshdi.
Arteta futbolchisining jamoaga taʼsiri haqida shunday dedi: "Uning klubdagi, jamoadagi va maydondagi roli sezilarli darajada oʻsdi. U hozir oʻziga xos mavqega va ajoyib auraga ega. U oʻyinni istalgan vaqtda oʻzgartira oladigan va raqibda haqiqiy xavotir uygʻotadigan darajadagi futbolchidir".
Murabbiy Sakaning jarohatlar tufayli oʻtkazib yuborgan vaqtini ijobiy baholab, bu holat futbolchining mavsum soʻnggiga yangi kuch va motivatsiya bilan kirib kelishiga yordam berganini qoʻshimcha qildi. Arteta oʻz shogirdiga aynan shu ruhiy holat jamoaga katta yordam berishini uqtirgan.
“Zamin”ni Telegramʻda oʻqing!
