Italiya A Seriyasining navbatdagi turidan o‘rin olgan Bolonya jamoasiga qarshi bahs oldidan Napoli jiddiy yo‘qotishga uchradi. Jamoa yetakchisi Kevin De Bruyne mashg‘ulotlardagi to‘qnashuv sababli o‘yin qaydnomasidan chetda qoldi. Bu haqda Goal.com xabar beradi.
Bosh murabbiy Antonio Conte DAZN telekanaliga bergan intervyusida belgiyalik yarim himoyachining jarohati haqida ma’lumot berdi. Uning so‘zlariga ko‘ra, mashg‘ulot vaqtida jamoadoshi bilan to‘qnashib ketgan futbolchining yuz qismi jiddiy shikastlangan.
"Mashg‘ulotda bosh bilan to‘qnashuv yuz berdi va uning yonoq suyagi yorilib ketdi. Shifokorlar to‘rt chok qo‘yishdi. Bosh miya jarohati aniqlanmagan bo‘lsa-da, u maydonga tusha olmaydi", — dedi Antonio Conte.
Shunga qaramay, Napoli tarkibida ijobiy yangilik ham bor. Jamoa sardori Giovanni Di Lorenzo safga qaytdi va asosiy tarkibda maydonga tushdi. Antonio Conte sardorning qaytishi jamoa uchun katta ruhiy va taktik ustunlik ekanligini ta’kidladi.
“Zamin”ni Telegramʻda oʻqing!
