Portugaliyalik himoyachi Joao Cancelo Saudiya Arabistonining Al-Hilal klubi rahbariyatini o‘ziga berilgan vaʼdalarni bajarmaganlikda aybladi. Futbolchining so‘zlariga ko‘ra, klub mutasaddilari uni Saudiya Pro ligasi uchun ro‘yxatdan o‘tkazishga vaʼda berishgan, biroq yakunda bu ishni amalga oshirishmagan. Bu haqda Goal.com xabar beradi.
DAZN nashriga bergan intervyusida Cancelo vaziyatga oydinlik kiritdi: "Al-Hilal klubida menga haqiqatni aytmagan insonlar bor edi. Ular meni tarkibga kiritishlarini aytishgandi, ammo vaqt kelganda so‘zlaridan qaytishdi. Men har doim o‘z so‘zimning ustidan chiqaman va hech kimga nisbatan gina saqlamayman".
Hozirda Barselona safida ijara asosida to‘p surayotgan himoyachi Hansi Flick qo‘l ostida o‘zining eng yaxshi sport formasini tiklab oldi. U kataloniyaliklar tarkibida 2025-26 yilgi mavsumda La Liga chempionligini qo‘lga kiritdi va o‘z faoliyatidagi yutuqlar qatoriga yana bir muhim sovrinni qo‘shib qo‘ydi.
Al-Hilal klubi esa futbolchini tekinga qo‘yib yuborishni istamayapti va uning transferi uchun 15 million yevro talab qilmoqda. Barselona esa Canceloni faqat erkin agent sifatida saqlab qolish niyatida, bu esa tomonlar o‘rtasidagi muzokaralarni murakkablashtirmoqda.
Taʼkidlash joizki, 31 yoshli himoyachi faoliyati davomida Yevropaning top-5 chempionatlaridan to‘rttasida g‘olib chiqishga muvaffaq bo‘ldi. U avvalroq Manchester Siti bilan Angliya Premer-ligasi, Yuventus bilan A Seriya va Bavariya bilan Bundesliga chempionligini qo‘lga kiritgan edi.
“Zamin”ni Telegramʻda oʻqing!
