Ispaniya futbolida “Barselona” va “Real Madrid” o‘rtasidagi raqobat yana maydon tashqarisida ham qizg‘in tus olmoqda. Bu safar kataloniyaliklar “Real Madrid” prezidenti Florentino Peresning so‘nggi bayonotlariga rasmiy munosabat bildirdi.
“Barselona” klubi o‘z rasmiy sayti orqali e’lon qilgan bayonotida Peres tomonidan aytilgan fikrlar va ayblovlar hozirda klubning yuridik bo‘limi tomonidan diqqat bilan o‘rganilayotganini ma’lum qildi. Kataloniyaliklar masalaga shoshma-shosharlik bilan emas, huquqiy jihatdan puxta yondashishni maqsad qilganini bildirmoqda.
Avvalroq Florentino Peres matbuot anjumanida “Barselona” va hakamlar texnik qo‘mitasining sobiq vitse-prezidenti Xose Mariya Negreyra o‘rtasidagi aloqalar haqida gapirgan edi. “Real” rahbari ushbu hamkorlikda korrupsion holatlar bo‘lganini ta’kidlab, bu ishga oid tegishli hujjatlar UYEFAga taqdim etilishini aytgan.
Bu bayonot Ispaniya futbolida yana katta shov-shuv uyg‘otdi. Chunki “Negreyra ishi” atrofidagi bahslar avvaldan ham “Barselona” imijiga bosim o‘tkazib kelayotgan edi. Endi esa “Real Madrid” prezidentining ochiq ayblovlari vaziyatni yanada jiddiylashtirdi.
“Florentino Peres chaqirgan matbuot anjumani munosabati bilan shuni ma’lum qilamizki, klubimizning yuridik bo‘limi uning bayonotlari va ayblovlarini diqqat bilan o‘rganmoqda. Hozirda ular tahlil qilinmoqda va keyingi qadamlar baholanyapti. O‘z pozitsiyamizni va qabul qilinishi mumkin bo‘lgan qarorlar haqida tegishli vaqtda qo‘shimcha ma’lumot beramiz”, — deyiladi “Barselona” bayonotida.
Kataloniya klubining bu javobi ancha ehtiyotkor, ammo jiddiy ruhda berilgan. Ya’ni “Barselona” hozircha keskin bayonotlar bilan chiqmayapti, biroq Peresning so‘zlarini e’tiborsiz qoldirmasligini ham ochiq ko‘rsatdi. Huquqiy bo‘lim tahlilni yakunlagach, klub keyingi qadamlarini belgilashi kutilmoqda.
Bu vaziyat “El-Klasiko” raqobati faqat maydondagi gollar, g‘alabalar va sovrinlar bilan cheklanmasligini yana bir bor isbotladi. “Real” va “Barselona” o‘rtasidagi har bir bayonot ham katta futbol voqeasiga aylanadi. Bu safar esa gap obro‘, huquqiy pozitsiya va xalqaro futbol tashkilotlari darajasidagi baholash haqida ketmoqda.
Qisqasi, Ispaniya futbolida yana “katta seriya” boshlandi. Maydonda to‘p hali tepilmasidan, bayonotlar o‘ziyoq o‘yinni qizdirib yubordi. Endi muxlislar “Barselona”ning keyingi rasmiy qadami qanday bo‘lishini kutishmoqda.
“Zamin”ni Telegramʻda oʻqing!
