RB Leyptsig yulduzi Yan Diomande Liverpul bilan bogʻliq transfer mish-mishlari unga qoʻshimcha motivatsiya berayotganini tan oldi. 19 yoshli vinger Bundesligadagi debyut mavsumida koʻrsatgan ajoyib oʻyini bilan Yevropaning yetakchi klublari eʼtiborini tortdi. Bu haqda Goal.com xabar beradi.
Yosh futbolchi transferlar haqidagi gap-soʻzlarga qaramay, diqqatini faqat maydondagi oʻyinga qaratganini taʼkidladi. Uning soʻzlariga koʻra, bunday qiziqishlar uning yanada koʻproq ishlashiga turtki boʻlmoqda, biroq maydon tashqarisidagi masalalar bilan vakillari shugʻullanishadi.
Diomande oʻtgan yili Leganesdan 20 million yevro evaziga Leyptsigga oʻtgan edi. U klub bilan 2030-yilgacha moʻljallangan shartnomaga ega va jamoasiga boʻlgan sadoqatini yashirmaydi. Futbolchi nafaqat maydonda, balki hayotda ham klub unga va oilasiga katta yordam berganini alohida qayd etdi.
Joriy mavsumda barcha musobaqalarda 13 ta gol va 9 ta golli uzatmaga mualliflik qilgan iqtidorli futbolchi oʻzining tezkor oʻsishiga xotirjamlik bilan qaraydi. U Leyptsig rahbariyatiga oʻziga bildirgan ishonchi uchun minnatdorchilik bildirib, bor kuchini jamoa muvaffaqiyati uchun sarflashini aytdi.
“Zamin”ni Telegramʻda oʻqing!
