Santos bosh murabbiyi Cuca Neymar Braziliya terma jamoasining 2026-yilgi Jahon chempionati uchun tarkibidan joy olishiga ishonchi komil. Bu fikr hujumchining Kopa do Brazilda Koritiba ustidan qozonilgan 2:0 hisobidagi gʻalabada koʻrsatgan yorqin oʻyinidan soʻng yangradi. Bu haqda Goal.com xabar beradi.
34 yoshli Neymar uchrashuvning 20-daqiqasida Gabriel Bontempoga golli uzatma berib, jamoasining gʻalabasida muhim rol oʻynadi. Cuca futbolchining oʻyin uslubi oʻzgarganini va uning taktik zakovati Carlo Ancelotti boshchiligidagi terma jamoa uchun katta yordam boʻlishini taʼkidladi.
Murabbiyning soʻzlariga koʻra, Neymar endilikda maydonning turli nuqtalarida, xususan, qanotda, 10-raqamli pleymeyker yoki soxta toʻqqizlik pozitsiyalarida samarali harakat qila oladi. Uning tajribasi va oʻyinni tashkil etish qobiliyati Braziliya terma jamoasi uchun ayni muddao.
Neymar 2023-yil oktyabridan buyon terma jamoada maydonga tushmagan boʻlsa-da, uning joriy mavsumdagi oʻyinlari Ancelottini ishontirish uchun yetarli boʻlishi kutilmoqda. Yakuniy 26 kishilik tarkib 18-may kuni Rio-de-Janeyroda eʼlon qilinadi.
“Zamin”ni Telegramʻda oʻqing!
