James Maddison Tottenxem jamoasining hozirgi ogʻir holati haqida ochiq gapirib, klubning quyi ligaga tushib ketish xavfi ostida qolganini "uyatli" deb atadi. Angliyalik yarim himoyachi uzoq muddatli jarohatdan soʻng safga qaytgan boʻlsa-da, jamoasini xavfli hududdan olib chiqish uchun borini bermoqda. Bu haqda Goal.com xabar beradi.
Seshanba oqshomida "Stemford Bridj"da boʻlib oʻtgan bahsda Tottenxem Chelsi jamoasiga 2:1 hisobida imkoniyatni boy berdi. Enzo Fernandez va Andrey Santosning gollari mezbonlarga ustunlik bergan boʻlsa, Richarlison tomonidan kiritilgan javob goli mehmonlar uchun tasalli boʻlishdan nariga oʻtmadi. Ushbu magʻlubiyatdan soʻng Spurs Angliya Premer-ligasi jadvalida 17-oʻrinda qolib, xavfli hududdan atigi ikki ochko yuqorida turibdi.
Agar soʻnggi turda 18-oʻrindagi Vest Xem jamoasi Lids ustidan gʻalaba qozonsa va Tottenxem magʻlub boʻlsa, Shimoliy London klubi Chempionshipga tushib ketadi. Maddison Sky Sports nashriga bergan intervyusida klubning bu mavsumdagi inqirozi haqida toʻxtalib: "Biz klub, logotip va muxlislar uchun borimizni berishimiz kerak. Bunday pozitsiyada ekanligimiz biroz uyatli holat", — deb taʼkidladi.
Yarim himoyachi, shuningdek, oʻzining sogʻligʻi borasidagi xavotirlarini ham yashirmadi. Aprel oyida tizzasidagi ogʻir operatsiyadan soʻng maydonga qaytgan futbolchi yana jarohat olishdan qoʻrqmoqda. "Futbolda ishlaydigan yoki bunday jarohat olgan har bir kishi biladiki, darhol yuqori darajaga qaytish oson emas. Agar yana biror narsa sodir boʻlsa, bu faoliyatim uchun halokatli boʻlishi mumkin", — deya qoʻshimcha qildi James Maddison.
“Zamin”ni Telegramʻda oʻqing!
