Braziliya terma jamoasi yulduzi Neymar JCh-2026 uchun qaydnomaga kiritilganidan bir necha kun oʻtib, yana jarohat oldi. Santos hujumchisida boldir mushaklari bilan bogʻliq muammo aniqlangan, bu esa uning Shimoliy Amerikada boʻlib oʻtadigan turnirga tayyorgarligi borasida xavotirlarni keltirib chiqardi. Bu haqda Goal.com xabar beradi.
Santos klubi tibbiyot boʻlimi rahbari Rodrigo Zogaibning maʼlum qilishicha, tibbiy koʻriklar Neymar oʻng oyogʻining boldir qismida 2 millimetrli shish borligini koʻrsatgan. Bu 34 yoshli futbolchi uchun noqulay vaqtda yuz berdi, chunki u 2023-yilda olgan ogʻir tizza jarohatidan soʻng yaqindagina Braziliya terma jamoasiga qaytgan edi.
Hujumchi allaqachon Santosning Kopa Sudamerikana doirasidagi San Lorenso bilan oʻyinini oʻtkazib yubordi va Gremio bilan boʻladigan chempionat bahsida ham maydonga tushmasligi kutilmoqda. Endilikda Neymar 27-may kuni terma jamoa ixtiyoriga yetib borish uchun tiklanish jarayonini tezlashtirishi lozim.
Klub shifokori Zogaib jarohat jiddiy emasligini va futbolchi kelasi haftaga qadar tayyor boʻlishiga ishonishini bildirdi. Neymar esa terma jamoaga qaytishi haqida gapirar ekan, uzoq tanaffusdan soʻng bu chaqiruv unga qanchalik hissiy taʼsir qilganini va barcha qiyinchiliklarni yengib oʻtishga arziguligini taʼkidladi.
“Zamin”ni Telegramʻda oʻqing!
