Angliya terma jamoasi sardori Harry Kane Bavariya bilan yangi shartnoma imzolash masalasini Jahon chempionatidan keyinga qoldirishga qaror qildi. Myunxen klubi prezidenti Herbert Hainerning soʻzlariga koʻra, klub hujumchi bilan uzoq muddatli hamkorlikni davom ettirish niyatida boʻlsa-da, futbolchining oʻzi hozircha shoshilinch qaror qabul qilmoqchi emas. Bu haqda Goal.com xabar beradi.
Hozirda 32 yoshda boʻlgan hujumchi Allianz Arenaʼdagi faoliyatidan toʻliq mamnun va bor eʼtiborini joriy mavsumdagi maqsadlarga qaratgan. Hainerning taʼkidlashicha, Kane shartnoma masalasida hech qanday bosim sezmayapti va muzokaralarni xotirjamlik bilan davom ettirmoqda. "Harry biz bilan qolishni xohlashiga ishonaman. Uning oʻzi bu jarayonni mundialdan keyin hal qilishni maʼqul koʻrdi", — dedi klub rahbari.
Muzokaralarning moliyaviy tomoni ham muhim ahamiyatga ega. Maʼlumotlarga koʻra, Kane jamoaning asosiy yulduzi sifatidagi maqomiga mos keladigan maosh soʻramoqda va uning talablari Jamal Musiala darajasidagi moliyaviy paketni oʻz ichiga olishi mumkin. Shuningdek, hujumchi Myunxen klubi bilan 2030-yilgacha moʻljallangan kelishuvga erishib, Germaniyada oʻz merosini qoldirishni maqsad qilgan.
Bavariya rahbariyati nafaqat Kane, balki boshqa hujumkor yulduzlarni ham jamoada olib qolish niyatida. Xususan, yozgi transferlar oynasida kelib qoʻshilgan Michael Olise borasida ham Hainer aniq fikr bildirdi. Uning aytishicha, 2029-yilgacha shartnomasi bor boʻlgan fransiyalik futbolchi dunyoning eng kuchli hujum chiziqlaridan birida oʻynamoqda va uning boshqa klubga oʻtishi uchun hech qanday sabab yoʻq.
“Zamin”ni Telegramʻda oʻqing!
